अलिबाग (प्रतिनिधी): नवीन शैक्षणिक धोरणातील त्रिभाषिक योजनेनुसार, महाराष्ट्रातील इंग्रजी आणि मराठी माध्यमांच्या शाळांमध्ये, तिसरी भाषा म्हणून, इयत्ता पहिलीपासून, हिंदी भाषा अनिवार्य करण्याचा निर्णय शासनाने घेतला आहे. या विरोधात मनसे आणि शिवसेना ठाकरे गट यांच्यातर्फे मुंबईत ५ जुलै रोजी मोर्चा काढण्यात येणार आहे. या मोर्चात शेतकरी कामगार पक्ष (शेकाप ) सहभागी होणार अशी माहिती शेकाप सरचिटणीस जयंत पाटील यांनी दिली.
अलिबाग येथील शेतकरी भवन येथे रविवारी (दि. २९ ) आयोजित करण्यात आलेल्या पत्रकार परिषदेत जयंत पाटील यांनी ही माहिती दिली. हिंदीला आमचा विरोध नाही. पहिलीपासून हिंदीच्या सक्तीला आमचा विरोध आहे. तिसरी भाषा म्हणून इयत्ता पहिलीपासून, हिंदी भाषा अनिवार्य करण्याचा निर्णय शासनाने घेतला शासनाचा हा निर्णय मराठी भाषकांवर हिंदीची सक्ती लादण्याचा प्रकार असून, महाराष्ट्रीय जनता हा अन्याय खपवून घेणार नाही असा इशारा शेकाप सरचिटणीस जयंत पाटील यांनी यावेळी दिला.
केवळ हिंदी सक्ती नाही तर यांना संपूर्ण शैक्षणिक धोरण बदलायचे आहे. सरकारला मनुवादी शिक्षण आणायचे आहे. हिंदी सक्ती हा मराठी संस्कृतीवर घाला आहे. महाराष्ट्राचे मराठीपण घालवण्याचे कारस्थान आहे अशी टीका जयंत पाटील यांनी केली.
जनसुरक्षामुळे अधिकारांवर गदा
जनसुरक्षा विधेयकामुळे सर्वसामान्यांच्या घटनात्मक अधिकारावर गदा येणार आहे. सामाजिक चळवळी , जनआंदोलने आणि विरोधीपक्षांना दडपण्यासाठी या कायद्याचा वापर केला जाणार आहे. त्याविरोधात डाव्या पक्षांतर्फे ३० जून रोजी मुंबईत आंदोलन केले जाणार आहे, अशी माहिती शेकापचे सरचिटणीस जयंत पाटील यांनी दिली.
शक्तिपीठला विरोध
शक्तीपीठ महामार्गामुळे हजारो एकर बागायती उद्ध्वस्त होणार आहेत. त्या विरोधात शेतकऱ्यांनी हरकती दिल्या आहेत. शेतकरी भूमिहीन होणार आहेत. त्यामुळे हा महामार्ग रद्द करावा, अन्यथा राज्यभर तीव्र आंदोलन करण्यात येईल, असा ईशारा जयंत पाटील यांनी यावेळी दिला.
