रायगडच्या किनारयांवर हजारो अनधिकृत बोटी सागरी सुरक्षेला धोका

06 जुलैच्या रात्री भारतीय तटरक्ष दलाला रायगड जिल्ह्यातील कोर्लई किल्ल्याजवळ एक संशयित बोट आढळल्याची माहिती मिळाली. ‘Muqadar Boya 99’ नावाची ही बोट MMSI-463800411 क्रमांकाची असून ती पाकिस्तानातून आलेली असण्याची शक्यता वर्तवली गेली होती.  तटरक्षक दल, नौदल व दिल्ली येथून मिळालेल्या माहितीच्या आधारे रायगड जिल्हा पोलिस दल सतर्क झाले. सदरची बोट अत्यंत संवेदनशील पद्धतीने कोस्टल अलर्ट अंतर्गत आढळल्यामुळे पोलिस दलाकडून तात्काळ तपास सुरू करण्यात आला. बोटमध्ये कोणीही उपस्थित नव्हते, मात्र तिचा संशयास्पद स्वरूप व स्थल निश्चितीमुळे अधिक तपासासाठी वरिष्ठ पोलीस अधिकारी, शासकीय यंत्रणा आणि गुप्तचर विभाग घटनास्थळी दाखल झाले होते. अधिक तपास केला असता बोया असल्याचे पोलिसांनी स्पष्ट केले होते, मात्र सादरचा बोया अद्यापही पोलिसांच्या हाती लागलेला नाही. बोयाचा तपास करण्यासाठी रायगड जिल्ह्यात सर्च आणि कोंबिंग ऑपरेशन राबवण्यात येत आहे. त्यामध्ये एक हजाराहून अधिक बेकायदेशीर बोटी असल्याचे समोर आले आहे. सदर बेकायदेशीर बोटिंची माहिती मत्स्य व्यवसाय आयुक्त आणि सहआयुक्त यांना कारवाई करण्यासाठी देण्यात आल्याचे दलाल यांनी सांगितले.

सागरी सुरक्षा आणि मच्छीमारांच्या सुरक्षेसाठी बोटींची नोंदणी अतिशय आवश्यक आहे. मच्छीमारांच्या बाबतीत अप्रिय घटना घडल्यास त्या बोटिंचा शोध घेता आला पाहिजे तसेच त्यांना मदत मिळून देण्यासाठी नोंदणी आवश्यक आहे, याकडेही दलाल यांनी लक्ष वेधले.