अलिबाग (प्रतिनिधी): अलिबाग शहरात सततच्या पावसामुळे शहरातील अनेक भागांत पाणी तुंबण्याच्या घटना समोर येत आहेत. मुख्य रस्त्यांपासून गल्लीबोळांपर्यंत पावसाचे साचलेले पाणी नागरिकांच्या दैनंदिन हालचालींस अडथळा ठरत आहे.
शहरातील गटारे तुंबलेली असून, सफाई न झाल्याने पाणी वाहून न जाता रस्त्यावर साचत आहे. त्यामुळे दुर्गंधी पसरत असून, आरोग्य धोक्यात येण्याची शक्यता व्यक्त केली जात आहे. अनेक भागांमध्ये नागरिकांनी स्वखर्चाने व श्रमाने गटारे स्वच्छ करण्याचा प्रयत्न केला, मात्र पालिकेचे दुर्लक्ष सुरूच आहे.
स्थानिक रहिवाशांनी नगरपालिकेकडे अनेक वेळा तक्रार केली असली तरी अद्याप कोणतीही ठोस कारवाई करण्यात आलेली नाही. पावसाळ्यापूर्वी गटारे आणि नाल्यांची नियमित सफाई झाली असती, तर ही परिस्थिती ओढवली नसती, अशी टीका नागरिकांतून होत आहे.
नगरपालिकेच्या हलगर्जीपणामुळे नागरिक त्रस्त झाले असून, प्रशासनाने तात्काळ पावसाचे पाणी उपसण्याची आणि गटारे स्वच्छ करण्याची मागणी होत आहे.
