धुमाकूळ घालणारा पाऊस: रायगडमध्ये जनजीवन विस्कळीत, खोपोलीसह अनेक ठिकाणी पूरसदृष्य स्थिती

रायगड (प्रतिनिधी): रायगड जिल्ह्यात पावसाने पुन्हा एकदा जोरदार हजेरी लावली असून, गेल्या २४ तासांत मुसळधार पावसामुळे अनेक तालुक्यांमध्ये जनजीवन विस्कळीत झाले आहे. विशेषतः कर्जत, खालापूर, माणगाव आणि पोलादपूर तालुक्यांना पावसाचा जबरदस्त फटका बसला आहे.

खोपोली शहरातील सखल भागात पूरसदृष्य परिस्थिती निर्माण झाली असून, विहारी आणि काटरंग परिसर जलमय झाले आहेत. अनेक भागांमध्ये रस्ते पाण्याखाली गेले असून, स्थानिक प्रशासनाने परिस्थिती लक्षात घेऊन खोपोलीतील शाळांना सुट्टीबाबत निर्णय घेण्याच्या सूचना दिल्या आहेत.

भिरा धरणातून ४१.६० घन मीटर प्रती सेकंद वेगाने पाण्याचा विसर्ग सुरू करण्यात आला आहे. त्यामुळे कुंडलिका नदीच्या काठावरील गावांना सतर्कतेचा इशारा देण्यात आला आहे. स्थानिक प्रशासन व आपत्ती व्यवस्थापन यंत्रणा सतर्क असून नागरिकांनी नदीकाठी जाऊ नये, असे आवाहन करण्यात आले आहे.

गुरुवारी सकाळपासून पावसाचा जोर कमी असला तरी संध्याकाळनंतर पावसाने जोर पकडला. संपूर्ण रात्र पावसाच्या संततधार सरी कोसळत होत्या आणि शुक्रवारी सकाळपर्यंत पावसाची स्थिती कायम होती. परिणामी अनेक ठिकाणी पाणी साचणे, झाडे कोसळणे, वीजपुरवठा खंडित होणे अशा घटना घडल्या आहेत.

जिल्ह्यात एकूण ७०.७२ मिमी पावसाची नोंद झाली आहे. हवामान विभागाने पुढील दोन दिवसांसाठी रेड अलर्ट जारी केला आहे. त्यामुळे नागरिकांना अनावश्यक प्रवास टाळण्याचे आवाहन करण्यात आले असून, आपत्कालीन यंत्रणा सज्ज ठेवण्यात आली आहे.

स्थानिक प्रशासन सतर्क असून आपत्तीग्रस्त ठिकाणी मदत व बचावकार्य सुरू आहे. नागरिकांनी प्रशासनाच्या सूचनांचे पालन करावे, असे आवाहन करण्यात आले आहे.