अलिबाग (प्रतिनिधी): कारगिल युद्धातील शौर्याचा स्मरणार्थ दरवर्षी २६ जुलै रोजी ‘कारगिल विजय दिवस’ साजरा केला जातो. या युद्धात अलिबाग तालुक्यातील सहाणगोठी गावचे सुपूत्र शहीद जवान निलेश नारायण तुणतुणे यांनी वयाच्या अवघ्या २३ व्या वर्षी देशासाठी बलिदान दिले. त्यांच्या स्मरणार्थ स्पर्धा विश्व अकॅडमीच्या विद्यार्थ्यांनी त्यांच्या स्मारकाला भेट देत अभिवादन केले.
या कार्यक्रमाचे आयोजन मेरा युवा भारत (युवा कार्यक्रम व क्रीडा मंत्रालय, भारत सरकार), अलिबाग पोलीस स्टेशन, प्रिझम सामाजिक विकास संस्था, स्वयंसिद्धा संस्था आणि स्पर्धा विश्व अकॅडमी, अलिबाग यांच्या संयुक्त विद्यमाने करण्यात आले.
या वेळी गावातून शौर्य रॅली काढण्यात आली. “भारत माता की जय” आणि “शहीद जवान अमर रहें” अशा घोषणांनी परिसरात राष्ट्रभक्तीचे वातावरण निर्माण झाले. त्यानंतर शहीद निलेश तुणतुणे यांच्या अर्धाकृती पुतळ्यास पुष्पहार अर्पण करून आदरांजली वाहण्यात आली.
जिल्हा युवा अधिकारी अमित पुंडे यांनी शहीद जवानांच्या वडील नारायण तुणतुणे यांचा सन्मान केला. तसेच उपस्थित सर्व कुटुंबीय व ग्रामस्थांचे आभार मानले.
या वेळी पोलीस निरीक्षक किशोर साळे, शहीद जवानांचे बंधू शैलेश तुणतुणे, तपस्वी नंदकुमार गोंधळी (प्रिझम संस्था), सुचिता काशिनाथ साळवी (स्वयंसिद्धा संस्था व स्पर्धा विश्व अकॅडमी) आणि ग्रामस्थ उपस्थित होते.
—
