ब्रेक फेल झालेल्या कंटेनरने 20 ते 25 वाहनांना दिली धडक; एका महिलेचा मृत्यू, 21 जखमी
खोपोली (प्रतिनिधी): मुंबई-पुणे द्रुतगती महामार्गावर आज दुपारी बोरघाट घाटमाथ्यावर भीषण अपघात झाला. ब्रेक फेल झालेल्या कंटेनरने समोरील तब्बल 20 ते 25 वाहनांना जोरदार धडक दिली. या अपघातात एका महिलेचा मृत्यू झाला असून 21 जण जखमी झाले आहेत.
प्राथमिक माहितीनुसार, पुण्याहून मुंबईकडे जात असलेला एक कंटेनर बोरघाट उतारावर असताना त्याचे ब्रेक फेल झाले. वाहनावरील नियंत्रण सुटल्याने कंटेनरने समोरील कार, बस, ट्रक आदी वाहनांना बेधडक धडक दिली. या दरम्यान महामार्गावर एकच गोंधळ उडाला होता.
अपघाताची माहिती मिळताच खोपोली पोलीस, बोरघाट वाहतूक शाखा, आयआरबी पथक, हेल्प फाउंडेशनचे सदस्य तातडीने घटनास्थळी दाखल झाले. बचावकार्यातील पथकांनी अपघातग्रस्त वाहनांमध्ये अडकलेल्या प्रवाशांना बाहेर काढून एमजीएम रुग्णालय आणि खोपोली नगरपालिकेच्या रुग्णालयात उपचारासाठी दाखल केले.
दरम्यान, ट्रक चालकाला घटनास्थळीच मोठ्या शिताफीने अटक करण्यात आली असून पुढील तपास खोपोली पोलीस करत आहेत.
या अपघातामुळे मुंबई-पुणे द्रुतगती मार्गावरील वाहतूक काही काळ विस्कळीत झाली होती. अपघातग्रस्त वाहने हटवून वाहतूक पूर्वपदावर आणण्याचे काम सुरू आहे.









