अलिबाग (प्रतिनिधी): अलिबागचे ज्येष्ठ उद्योजक आणि सामाजिक कार्यकर्ते स्व. ला. गजेंद्र तुकाराम दळी यांच्या स्मरणार्थ आयोजित करण्यात आलेली शोकसभा गुरूवार, ३१ जुलै २०२५ रोजी सकाळी ११ वाजता अलिबागमधील हॉटेल वेव्हज सभागृहात पार पडणार आहे.
या शोकसभेचे आयोजन लायन्स क्लब अलिबाग आणि ज्येष्ठ नागरिक संघटना, अलिबाग यांनी संयुक्तपणे केले आहे. अलिबाग शहराच्या सामाजिक आणि औद्योगिक विकासात मोलाचा वाटा उचललेल्या दळी यांचे नुकतेच निधन झाले. त्यांच्या जाण्याने अलिबागमधील व्यावसायिक, सामाजिक आणि सांस्कृतिक क्षेत्रात मोठी पोकळी निर्माण झाली आहे.
गजेंद्र दळी यांनी आपल्या कार्यकाळात अलिबागमधील लघुउद्योगांना चालना दिली होती. त्यांचा समाजातील वंचित घटकांसाठी कायम सक्रिय सहभाग राहिला. त्यांच्या कार्याची आठवण ठेवत त्यांना आदरांजली अर्पण करण्यासाठी अनेक मान्यवर, सहकारी, नागरिक आणि मित्रपरिवार या शोकसभेला उपस्थित राहण्याची शक्यता आहे.
कार्यक्रमात विविध मान्यवर व्यक्ती त्यांच्या आठवणींना उजाळा देतील आणि त्यांच्या योगदानाबद्दल श्रद्धांजली व्यक्त करतील.
