अलिबाग (प्रतिनिधी): रायगड जिल्ह्यातील अलिबाग तालुक्यात जनावर चोरी करणाऱ्या टोळीचा पर्दाफाश करण्यात पोलिसांना यश आले आहे. तुंगारे फडपोकळी गावात शेतकऱ्यांच्या गोठ्यातील गायी चोरून नेण्याच्या प्रकरणी दोन आरोपींना अटक करण्यात आली आहे.
अटक करण्यात आलेले आरोपी विजय बेळकुंडे (वय 26) आणि भरत बेळकुंडे (वय 32, दोघे रा. दोंडगांव, ता. पेण) असून, त्यांनी 23 सप्टेंबर रोजी रात्री 1 वाजता तुंगारे येथील शेतकरी भूषण फडपोकळी यांच्या गोठ्यातून दोन गायी चोरल्या होत्या. आरोपींनी या गायींची सुमारे 30 हजार रुपयांत विक्री केली, असे तपासात उघड झाले आहे.
या गुन्ह्याची चौकशी उपनिरीक्षक फडके, सहायक निरीक्षक ठोकर, पोलीस हवालदार फडके, तसेच अलिबाग पोलीस ठाण्याच्या टीमने केली. आरोपींना अटक करून न्यायालयात हजर करण्यात आले असून, त्यांना तीन दिवसांची पोलीस कोठडी देण्यात आली आहे.
या टोळीतील आणखी दोन साथीदार फरार असून, पोलिस त्यांचा शोध घेत आहेत. या गुन्ह्यात वापरलेली मारुती सुझुकी कंपनीची (MH-02 BS 2753) ही गाडी जप्त करण्यात आली आहे. आरोपींनी पूर्वीही अशा प्रकारचे गुन्हे केले असल्याची शंका पोलिसांनी व्यक्त केली आहे.
