अलिबाग (प्रतिनिधी): मा. जिल्हा उपनिबंधक, सहकारी संस्था, रायगड व रायगड जिल्हा सहकारी पतसंस्था महासंघ, अलिबाग यांच्या संयुक्त विद्यमाने एकदिवसीय प्रशिक्षण कार्यशाळा रायगड जिल्हा मध्यवर्ती सहकारी बँकच्या अलिबाग येथील मुख्य कार्यालयातील सभागृहात उत्साहपूर्ण व शिस्तबद्ध वातावरणात पार पडली. जिल्ह्यातील ९४ सहकारी पतसंस्थांचे एकूण २४७ प्रतिनिधी या कार्यशाळेत सहभागी झाले होते. तसेच सर्व तालुक्यांचे मा. सहाय्यक निबंधकही आवर्जून उपस्थित होते.
कार्यक्रमाची सुरुवात सकाळी नोंदणी व नाश्त्याने झाली. त्यानंतर दीपप्रज्वलन करून उद्घाटन सोहळा संपन्न झाला. कार्यशाळेचे उद्घाटन मा. श्री. तनवीर पाटील (जिल्हा उपनिबंधक, रायगड) यांच्या हस्ते करण्यात आले. प्रमुख उपस्थिती म्हणून मा. ऍड. जे. टी. पाटील (अध्यक्ष, रायगड जिल्हा सहकारी पतसंस्था महासंघ) तसेच मा. श्री. मंदार वर्तक (मुख्य कार्यकारी अधिकारी, रायगड जिल्हा मध्यवर्ती सहकारी बँक) उपस्थित होते. मान्यवरांनी सहकार क्षेत्रातील बदलते कायदे, पारदर्शकता व उत्तरदायित्व यावर भर देत पतसंस्थांनी शिस्तबद्ध कामकाजाची दिशा स्वीकारावी, असे आवाहन केले.
प्रास्ताविक मा. सौ. रेखा गावडे (मा. सहाय्यक निबंधक, रोहा) यांनी केले. त्यांनी सहकार विभागाच्या नव्या नियमावली, परिपत्रके व मार्गदर्शक तत्त्वांचे काटेकोर पालन करण्यासाठी अशा प्रशिक्षण उपक्रमांची गरज अधोरेखित केली.
पहिल्या सत्रात “सहकार विभागाचे नवीनतम परिपत्रके व मार्गदर्शक तत्त्वे” या विषयावर श्री. सदानंद दिक्षित (माजी मुख्य कार्यकारी अधिकारी, पिपल्स को-ऑप बँक, पुणे) यांनी सविस्तर मार्गदर्शन केले. पतसंस्थांनी पारदर्शकता, नियमित लेखापरीक्षण, सदस्यांशी प्रभावी संवाद व कायदेशीर बाबींचे पालन यावर विशेष भर द्यावा, असे त्यांनी सांगितले.
दुपारच्या सत्रात “प्रभावी वसुलीसाठी पुनर्प्राप्ती व्यवस्थापन व कायदेशीर पावले” या विषयावर श्री. दिक्षित यांनी सखोल विवेचन केले. वाढती थकबाकी, कर्जवसुलीतील अडचणी, कायदेशीर उपाययोजना, मध्यस्थी व समेट प्रक्रिया याविषयी त्यांनी उदाहरणांसह मार्गदर्शन केले. प्रश्नोत्तर सत्रात प्रतिनिधींनी विविध शंका उपस्थित केल्या; त्यांचे समाधानकारक निरसन करण्यात आले.
समारोपप्रसंगी सहभागी प्रतिनिधींना प्रमाणपत्रांचे वितरण करण्यात आले. शेवटी श्री. योगेश मगर (सचिव, रायगड जिल्हा सहकारी पतसंस्था महासंघ) यांनी उपस्थित मान्यवर, सहाय्यक निबंधक, बँकेचे अधिकारी, प्रशिक्षक व सर्व प्रतिनिधींचे आभार मानले. भविष्यातही अशा उपक्रमांद्वारे सहकार क्षेत्र अधिक सक्षम व सक्षम बनवण्याचा निर्धार व्यक्त करण्यात आला.
संपूर्ण कार्यशाळा नियोजनबद्ध व सकारात्मक वातावरणात पार पडली. या उपक्रमामुळे सहकार क्षेत्रातील प्रशासकीय व कायदेशीर जाण अधिक दृढ होऊन पतसंस्थांच्या कार्यक्षमतेत निश्चितच वाढ होईल, असा विश्वास उपस्थितांनी व्यक्त केला.
