अलिबाग (प्रतिनिधी): पेढांबे-चिंचवली येथे सर्वसमावेशक प्राथमिक आरोग्य सेवा (CPHC) अंतर्गत आयोजित प्रशिक्षण शिबिराचे उद्घाटन जिल्हा परिषद सदस्य तथा प्रतोद अमितदादा नाईक यांच्या हस्ते उत्साहपूर्ण वातावरणात पार पडले. ग्रामीण भागातील नागरिकांना दर्जेदार, सुलभ आणि सर्वसमावेशक आरोग्य सेवा प्रभावीपणे उपलब्ध करून देण्याच्या उद्देशाने या प्रशिक्षण शिबिराचे आयोजन करण्यात आले.
या प्रशिक्षण शिबिरामध्ये आरोग्य अधिकारी, आरोग्य कर्मचारी, आशा सेविका तसेच संबंधित कर्मचाऱ्यांना विविध राष्ट्रीय आरोग्य योजनांची प्रभावी अंमलबजावणी, प्रतिबंधात्मक आरोग्य सेवा, असंसर्गजन्य आजारांचे व्यवस्थापन, मातृ व बाल आरोग्य, नियमित तपासण्या तसेच नागरिकांपर्यंत आरोग्य सेवा अधिक प्रभावीपणे पोहोचविण्याबाबत सविस्तर मार्गदर्शन करण्यात आले. प्राथमिक आरोग्य सेवा अधिक सक्षम, गुणवत्तापूर्ण आणि लोकाभिमुख करण्यासाठी आवश्यक प्रशिक्षणही देण्यात आले.
यावेळी अमितदादा नाईक यांनी आरोग्य विभागाच्या कार्याचे कौतुक करत ग्रामीण भागातील प्रत्येक नागरिकापर्यंत दर्जेदार आरोग्य सुविधा पोहोचविण्यासाठी अशा प्रशिक्षण शिबिरांची आवश्यकता अधोरेखित केली. आरोग्य कर्मचाऱ्यांनी सेवा देताना संवेदनशीलता, तत्परता आणि गुणवत्तेला प्राधान्य द्यावे, असे आवाहनही त्यांनी केले.
कार्यक्रमास आरोग्य विभागाचे अधिकारी, वैद्यकीय अधिकारी, आरोग्य कर्मचारी, आशा सेविका तसेच परिसरातील मान्यवर मोठ्या संख्येने उपस्थित होते. प्रशिक्षण शिबिरामुळे ग्रामीण आरोग्य व्यवस्था अधिक बळकट होण्यास आणि नागरिकांना सर्वसमावेशक आरोग्य सेवा अधिक प्रभावीपणे उपलब्ध होण्यास निश्चितच मदत होईल, असा विश्वास यावेळी व्यक्त करण्यात आला.
