रायगड (प्रतिनिधी): रायगड जिल्ह्यासाठी महत्त्वाकांक्षी ठरणाऱ्या अलिबाग येथील शासकीय वैद्यकीय महाविद्यालयाच्या इमारतीचे काम सध्या युद्धपातळीवर सुरू आहे. या प्रकल्पामुळे रायगड जिल्ह्यात आधुनिक आरोग्य सुविधा उपलब्ध होण्याबरोबरच स्थानिक विद्यार्थ्यांना वैद्यकीय शिक्षणाची मोठी संधी मिळणार आहे. प्रशासनाकडून कामाला गती देण्यात आली असून निर्धारित वेळेत प्रकल्प पूर्ण करण्याचे उद्दिष्ट ठेवण्यात आले आहे.
अलिबाग तालुक्यातील उसर येथे हे महाविद्यालय उभे राहत असून सुरुवातीच्या काळात वेगवेगळ्या कारणांमुळे या महाविद्यालयाच्या इमारतीचे काम रखडले होते. आता वादाचे सगळे मुद्दे गळून पडले असून या कामाने चांगलाच वेग घेतला आहे. शासकीय वैद्यकीय महाविद्यालयाची भव्य इमारत आता आकार घेऊ लागली आहे. सध्या विविध विभागांचे बांधकाम, आरसीसीची कामे, अंतर्गत सुविधा तसेच रुग्णालयाच्या इमारतीचे काम वेगाने सुरू आहे. अत्याधुनिक सुविधा असलेले हे वैद्यकीय महाविद्यालय रायगडसह कोकणातील नागरिकांसाठी आरोग्यसेवेचे मोठे केंद्र ठरणार आहे.
या प्रकल्पात वैद्यकीय महाविद्यालय, बहुविशेषज्ञ रुग्णालय, प्रयोगशाळा, विद्यार्थ्यांसाठी वसतिगृह, प्राध्यापकांचे निवासस्थान तसेच आधुनिक वैद्यकीय उपकरणांची सुविधा उपलब्ध करून दिली जाणार आहे. महाविद्यालय सुरू झाल्यानंतर जिल्ह्यातील रुग्णांना मुंबई किंवा पुण्याकडे धाव घेण्याची गरज मोठ्या प्रमाणात कमी होण्याची अपेक्षा आहे.
याचबरोबर रायगडमधील विद्यार्थ्यांना आपल्या जिल्ह्यातच वैद्यकीय शिक्षण घेण्याची संधी उपलब्ध होणार असून स्थानिक रोजगारालाही चालना मिळणार आहे. शासनाच्या महत्त्वाकांक्षी आरोग्य प्रकल्पांपैकी हा एक प्रकल्प मानला जात असून त्याचे काम वेळेत पूर्ण करण्यासाठी संबंधित यंत्रणा सातत्याने पाठपुरावा करत आहे.
अलिबागमधील शासकीय वैद्यकीय महाविद्यालयाचे काम वेगाने सुरू असल्याने रायगडच्या आरोग्य आणि शिक्षण क्षेत्रासाठी ही एक सकारात्मक घडामोड मानली जात आहे. प्रकल्प पूर्ण झाल्यानंतर संपूर्ण कोकणाच्या आरोग्य व्यवस्थेला नवी ताकद मिळेल, अशी अपेक्षा व्यक्त केली जात आहे.
