अलिबाग (प्रतिनिधी) : महसूल विभागाच्या कामकाजात उल्लेखनीय योगदान देत शासनाची प्रतिमा उंचावण्यासाठी उत्कृष्ट कार्य करणाऱ्या अधिकारी-कर्मचाऱ्यांचा महसूल दिनानिमित्त गौरव करण्यात आला. रायगड जिल्ह्यातील भूमी अभिलेख विभागात कार्यरत असलेले श्री. परेश पाटील, शिपाई, उपअधीक्षक भूमी अभिलेख, अलिबाग यांचा त्यांच्या उल्लेखनीय कामगिरीबद्दल सन्मानपत्र देऊन गौरव करण्यात आला.
१ ऑगस्ट रोजी महसूल दिनाचे औचित्य साधून हा गौरव करण्यात आला. सन २०२५-२६ या वर्षात रायगड जिल्ह्यातील भूमी अभिलेख विभागाच्या धोरण व अधिनियमाप्रमाणे उत्कृष्ट काम करून शासनाची प्रतिमा उंचावण्यास दिलेल्या योगदानाची दखल घेत परेश पाटील यांना हे प्रमाणपत्र प्रदान करण्यात आले.
भूमी अभिलेख विभागाच्या माध्यमातून नागरिकांशी संबंधित विविध शासकीय कामे, अभिलेखांची देखभाल, आवश्यक प्रशासकीय प्रक्रिया तसेच नागरिकांना सेवा देण्याचे महत्त्वपूर्ण काम केले जाते. या कामकाजात प्रत्येक कर्मचाऱ्याची भूमिका महत्त्वाची असून, प्रामाणिकपणे व जबाबदारीने काम करणाऱ्या कर्मचाऱ्यांचा गौरव केल्याने त्यांना प्रोत्साहन मिळते.
महसूल दिनाच्या निमित्ताने देण्यात आलेल्या या सन्मानामुळे परेश पाटील यांच्या कार्याची प्रशासनाकडून दखल घेण्यात आली असून, त्यांच्या कामाबद्दल अभिनंदनाचा वर्षाव होत आहे. मेहनत, कर्तव्यनिष्ठा आणि शासकीय जबाबदारी प्रभावीपणे पार पाडणाऱ्या कर्मचाऱ्यांच्या योगदानाचा गौरव करण्याची ही परंपरा प्रशासनातील सकारात्मक कार्यसंस्कृतीला चालना देणारी ठरत आहे.
