महाराष्ट्रात PUC प्रमाणपत्राच्या दरात वाढ; दुचाकीपासून डिझेल वाहनांपर्यंत सुधारित शुल्क लागू

मुंबई (प्रतिनिधी) : राज्यातील वाहनधारकांसाठी महत्त्वाची बातमी असून, मोटार वाहनांच्या वायुप्रदूषण तपासणीसाठी आकारण्यात येणाऱ्या प्रदूषण नियंत्रण प्रमाणपत्र (PUC) शुल्कात वाढ करण्यात आली आहे. महाराष्ट्र शासनाच्या परिवहन आयुक्त कार्यालयाने १७ ऑगस्ट २०२६ रोजी यासंदर्भात परिपत्रक जारी केले आहे.

महाराष्ट्र स्टेट पीयूसी सेंटर ओनर्स असोसिएशन, ठाणे यांनी PUC शुल्कात वाढ करण्याची मागणी केली होती. त्यानंतर परिवहन विभागाने त्रिसदस्यीय समिती स्थापन करून राज्यातील वायुप्रदूषण नियंत्रण प्रमाणपत्रांच्या दरांचा अभ्यास केला. समितीच्या अहवालानंतर शासनाकडे दरवाढीबाबत अहवाल सादर करण्यात आला. तसेच या प्रकरणी मुंबई उच्च न्यायालयाच्या आदेशानुसारही परिवहन विभागाने कार्यवाही केली.

परिवहन विभागाने दिलेल्या माहितीनुसार, राज्यातील मोटार वाहनांच्या वायुप्रदूषण तपासणीच्या दरांमध्ये सुधारणा करून नवीन दरांना मंजुरी देण्यात आली आहे. त्यामुळे आता वाहनांच्या प्रकारानुसार PUC प्रमाणपत्रासाठी अधिक शुल्क द्यावे लागणार आहे.

वाहननिहाय सुधारित PUC शुल्क

या सुधारित दरांची माहिती प्रत्येक वायुप्रदूषण नियंत्रण केंद्राच्या दर्शनी भागात ठळकपणे प्रदर्शित करण्याचे निर्देश देण्यात आले आहेत. तसेच वाहनधारकांना सुधारित शुल्काबाबत विविध प्रसिद्धी माध्यमांतून माहिती देण्याची सूचना करण्यात आली आहे.

परिपत्रकानुसार, संबंधित PUC केंद्रांकडून सुधारित दरांची अंमलबजावणी होत असल्याची खातरजमा करण्याचे निर्देशही देण्यात आले आहेत. निर्धारित दरापेक्षा अधिक शुल्क आकारले जाणार नाही, याची दक्षता घेण्याचे स्पष्ट करण्यात आले आहे.

दरम्यान, नवीन शुल्क आकारणीबाबत वाहनधारकांमध्ये संभ्रम निर्माण होऊ नये यासाठी प्रत्येक PUC केंद्राने सुधारित दरांचा फलक दर्शनी भागात लावणे आवश्यक राहणार आहे. त्यामुळे वाहनधारकांनी PUC प्रमाणपत्र काढताना केंद्रावर प्रदर्शित केलेले अधिकृत दर तपासूनच शुल्क भरावे, असे आवाहन करण्यात आले आहे.

दुचाकी वाहनांसाठी ₹१०, पेट्रोलवरील तीनचाकी वाहनांसाठी ₹२०, पेट्रोल/CNG/LPG वाहनांसाठी ₹१५, तर डिझेल वाहनांसाठी ₹३० इतकी वाढ करण्यात आली आहे. राज्यातील वाहनधारकांना या दरवाढीचा थेट आर्थिक परिणाम होणार आहे.