अध्यक्षांच्या भूमिकेचीही चौकशी करण्याची मागणी; ठाकरे गटाच्या प्रसाद भोईर यांची सीईओंशी भेट
अलिबाग (प्रतिनिधी): रायगड जिल्हा परिषदेत सहायक लेखा अधिकारी योगेश प्रकाश भस्मे यांना दीड लाख रुपयांची लाच स्वीकारताना लाचलुचपत प्रतिबंधक विभागाने रंगेहात पकडल्यानंतर आता या प्रकरणावरून विरोधक आक्रमक झाले आहेत. शिवसेना उद्धव बाळासाहेब ठाकरे पक्षाचे रायगड जिल्हा संपर्कप्रमुख प्रसाद भोईर यांनी मंगळवारी रायगड जिल्हा परिषदेच्या मुख्य कार्यकारी अधिकाऱ्यांची भेट घेत या प्रकरणाची सखोल चौकशी करण्याची मागणी केली.
जिल्हा परिषद अध्यक्ष मंगेश माकरीकर यांचे स्वीय सहाय्यक म्हणून काम करणाऱ्या योगेश भस्मे यांच्यावर तक्रारदाराच्या पत्नीची बदली करून देण्यासाठी दीड लाख रुपयांची लाच मागितल्याचा आरोप आहे. या प्रकरणात एसीबीने कारवाई करून भस्मे यांना लाच स्वीकारताना अटक केली होती. या कारवाईनंतर जिल्हा परिषद प्रशासनातील या प्रकरणाची चर्चा सुरू झाली आहे.
या पार्श्वभूमीवर प्रसाद भोईर यांनी जिल्हा परिषद सीईओंची भेट घेतली. लाचखोरीच्या या प्रकरणात केवळ संबंधित अधिकाऱ्यापुरती चौकशी मर्यादित न ठेवता, या प्रकरणामागे आणखी कोणाचा सहभाग आहे का, याचीही चौकशी करण्यात यावी, अशी मागणी त्यांनी केली. जिल्हा परिषद अध्यक्ष मंगेश माकरीकर यांचा या प्रकरणाशी काही संबंध आहे का, याचीही चौकशी व्हावी, अशी शक्यता भोईर यांनी व्यक्त केली.
दरम्यान, या प्रकरणाची सखोल आणि निष्पक्ष चौकशी करण्याची मागणी एसीबीच्या वरिष्ठ अधिकाऱ्यांकडेही करण्यात आल्याचे भोईर यांनी सांगितले. दोषींवर कठोर कारवाई करण्यात यावी आणि संपूर्ण प्रकरणातील वस्तुस्थिती जनतेसमोर आणावी, अशी मागणी त्यांनी केली.
दुसरीकडे काँग्रेसनेही या लाचखोरीच्या प्रकरणावरून जिल्हा परिषद अध्यक्ष मंगेश माकरीकर यांच्या राजीनाम्याची मागणी केली आहे. त्यामुळे जिल्हा परिषद प्रशासनातील लाचखोरीच्या या प्रकरणाचे राजकीय पडसाद उमटू लागले असून, आगामी काळात या प्रकरणावरून सत्ताधारी आणि विरोधकांमध्ये आरोप-प्रत्यारोप तीव्र होण्याची शक्यता आहे.
मात्र, या प्रकरणातील आरोपांची अंतिम सत्यता तपास आणि न्यायालयीन प्रक्रियेनंतरच स्पष्ट होणार आहे. संबंधित सर्व व्यक्तींना त्यांची बाजू मांडण्याची संधी मिळणेही आवश्यक आहे.
