गांधीगिरी आंदोलनातून सामाजिक कार्यकर्ते स्वप्नील नाईक यांनी वेधले शासनाचे लक्ष
पर्यटकांच्या सुरक्षेचा प्रश्न ऐरणीवर; रस्त्याची तातडीने दुरुस्ती करण्याची मागणी
अलिबाग (प्रतिनिधी) : अलिबाग-पेण मार्गावरील मैनुशेठ यांच्या वाड्याजवळ असलेल्या पुलावर रस्ता खचल्याने अपघाताचा धोका निर्माण झाला आहे. अलिबाग हे रायगड जिल्ह्यातील महत्त्वाचे पर्यटनस्थळ असल्याने येथे वर्षभर पर्यटकांची वर्दळ असते. मात्र, पुलावरील खचलेल्या रस्त्याचा अंदाज वाहनचालकांना, विशेषतः बाहेरून येणाऱ्या पर्यटकांना, वेळीच येत नसल्याने अपघात होण्याची शक्यता आहे. या गंभीर समस्येकडे शासनाचे लक्ष वेधण्यासाठी सामाजिक कार्यकर्ते स्वप्नील नाईक यांनी गांधीगिरीच्या मार्गाने आंदोलन केले.
या आंदोलनादरम्यान स्वप्नील नाईक यांनी महात्मा गांधी यांच्या तीन माकडांचे फलक हातात घेऊन संबंधित यंत्रणेच्या दुर्लक्षाकडे लक्ष वेधले. रस्त्याची दुरवस्था असूनही संबंधित प्रशासनाने याकडे गांभीर्याने लक्ष दिले आहे का, असा प्रश्न या अनोख्या आंदोलनातून उपस्थित करण्यात आला. यावेळी त्यांच्यासोबत अन्य कार्यकर्तेही उपस्थित होते.
अपघात होण्यापूर्वी दुरुस्ती करा!
अलिबागला पर्यटनासाठी येणाऱ्या पर्यटकांना शहराकडे येताना रस्त्यावरील धोकादायक ठिकाणांचा अंदाज येणे आवश्यक आहे. पुलावरील रस्ता खचल्याने वाहनचालकांना अचानक ब्रेक लावावा लागू शकतो किंवा वाहनावरील नियंत्रण सुटून अपघात होऊ शकतो. दुचाकीस्वारांसाठी तर हा भाग अधिक धोकादायक ठरू शकतो.
एखादी दुर्घटना घडल्यानंतर उपाययोजना करण्यापेक्षा संभाव्य धोका वेळीच ओळखून रस्त्याची दुरुस्ती करणे आवश्यक आहे. त्यामुळे संबंधित विभागाने या ठिकाणाची तातडीने पाहणी करून खचलेल्या रस्त्याची दुरुस्ती करावी. तोपर्यंत वाहनचालकांना सावध करण्यासाठी योग्य सूचना फलक आणि आवश्यक सुरक्षिततेच्या उपाययोजना कराव्यात, अशी मागणी या आंदोलनाच्या माध्यमातून करण्यात आली.
पर्यटनाच्या दृष्टीने महत्त्वाच्या असलेल्या अलिबागमधील रस्त्यांची सुरक्षितता राखणे ही प्रशासनाची जबाबदारी आहे. आता स्वप्नील नाईक यांच्या गांधीगिरी आंदोलनाची दखल घेऊन संबंधित यंत्रणा या पुलावरील रस्त्याची दुरुस्ती कधी करणार, याकडे नागरिकांचे लक्ष लागले आहे.
