अलिबाग तालुक्यातील नागाव हे गाव पर्यटनाच्या दृष्टीने महत्वाचे ठिकाण आहे. स्थानिकांना यातून रोजगाराचे साधन उपलब्ध होते. वर्षाला लाखो पर्यटक या ठिकाणी येतात. नागावमध्ये विजेचा वापरही मोठ्या प्रमाणात होत आहे. पावसाळ्यात तासनतास अंधारात राहण्याची वेळ येते. नागरिक यामुळे त्रस्त झाले आहे. दोन दिवसांपुर्वी झालेल्या अतिवृष्टीत नागावमध्ये पाचहून अधिक विद्यूत खांब कोसळले. त्यामुळे पाच ते सहा तास विज पुरवठा खंडीत झाला होता.
नागाव हे पर्यटन स्थळ असून अनेक कॉटेज, रिसॉर्ट येथे आहेत. विजेचा वापर नागावमध्ये वाढला आहे. विज पुरवठा सतत खंडीत होत असल्याने स्थानिक नागरिकांच्या विजेची उपकरणांचे नुकसान होत आहे. या समस्यांना स्थानिकांना कायमच सामोरे जावे लागत आहे. गावांमध्ये सतत विज पुरवठा खंडीत होतो. त्याचा नाहक त्रास नागावकरांना होत आहे. नागावमधील विजेचा प्रश्न सोडविण्यासाठी नागावच्या सरपंच हर्षदा मयेकर यांनी पुढाकार घेत नागावमध्ये स्विचींग सब स्टेशन उभारण्यासाठी महावितरण कंपनीकडे पाठपुरावा केला. त्यासाठी लागणारी जागा देखील ग्रामपंचायतीने दिली.जागा देऊन अनेक महिने उलटून गेली. परंतू जागा महावितरण कंपनीच्या ताब्यात देण्याच्या हालचाली कुर्मगतीने सुरू आहेत. अनेकवेळा महावितरणच्या अधिकाऱ्यांना भेटून ही जागा करारावर देण्याची प्रक्रीया कधी पुर्ण करणार असा सवाल हर्षदा मयेकर यांनी उपस्थित केला. तरीदेखील काही महावितरण विभागाच्या हालचाली दिसून आल्या नाही. अखेर त्यांनी महावितरणच्या कामाबाबत नाराजी व्यक्त करीत मंगळवारी चेंढरे येथील महावितरणच्या विभागीय कार्यालयाला भेट दिली. कार्यकारी अभियंता शैलेश कुमार यांची भेट घेतली. नागावमधील विजेच्या प्रश्नाचे गाऱ्हाणे मांडले. स्थानिकांना होणाऱ्या समस्यांची जाणीव करून दिली.स्विचींग सब स्टेशनमुळे नागावसह आजूबाजूच्या गावांमधील विजेचा प्रश्नही सुटणार असल्याचे सांगितले. अखेर शैलेश कुमार यांनी त्यांच्या मागणीची दखल घेत आठवड्यात प्रशासकीय प्रक्रीया पूर्ण करणार असल्याचे आश्वासन दिले. यावेळी नागाव ग्रामपंचायतीच्या सदस्या हर्षदा मयेकर, प्रियंका काटे, मंगला नागे, अंकीता शेवडे आदींसह महावितरणचे सहाय्यक अभियंता श्रीपाद लेले, अतिरिक्त कार्यकारी अभियंता आकाश तायडे उपस्थित होते.
——————————
