रोहा (प्रतिनिधी): भारतीय जनता पार्टी व भारतीय जनता युवा मोर्चा, रोहा यांच्या संयुक्त विद्यमाने गुणगौरव सोहळा 2025 चे आयोजन करण्यात आले. या कार्यक्रमात इयत्ता दहावी व बारावीच्या परीक्षेत उत्तीर्ण झालेल्या विद्यार्थ्यांचा सत्कार करण्यात आला.
हा कार्यक्रम विद्यार्थ्यांच्या यशाचे कौतुक करण्यासाठी व त्यांना पुढील वाटचालीस प्रेरणा देण्यासाठी आयोजित करण्यात आला होता. यावेळी प्रमुख पाहुणे म्हणून माजी आमदार पंडितशेठ पाटील, माजी जिल्हा परिषद सदस्य सौ. चित्राताई पाटील, तसेच भाजप प्रदेश कार्यकारी सदस्य श्री. राजेंद्र मापरा उपस्थित होते. त्यांनी विद्यार्थ्यांना शुभेच्छा देत त्यांच्या यशस्वी भवितव्यासाठी सदिच्छा व्यक्त केल्या.
पंडितशेठ पाटील यांनी आपल्या भाषणात सांगितले की, “विद्यार्थ्यांनी केवळ गुणांच्या मागे न लागता चांगले नागरिक बनण्यावर भर द्यावा. शिक्षण हे जीवन बदलण्याचे साधन आहे.”
चित्राताई पाटील यांनी विशेषतः विद्यार्थिनींना मार्गदर्शन करताना आत्मविश्वास आणि मेहनतीचे महत्त्व पटवून दिले. राजेंद्र मापरा यांनी विद्यार्थ्यांना करिअरच्या विविध वाटांबाबत माहिती देत त्यांना स्वप्न मोठी ठेवण्याचे आवाहन केले.
कार्यक्रमात अनेक विद्यार्थ्यांना प्रमाणपत्रे आणि स्मृतिचिन्ह देऊन गौरवण्यात आले. उपस्थित पालक आणि शिक्षकांनी या उपक्रमाचे मनःपूर्वक स्वागत करत भाजप आणि भाजयुमोच्या कौतुकाची थाप दिली.
कार्यक्रम यशस्वीपणे पार पाडण्यासाठी स्थानिक पदाधिकारी व कार्यकर्त्यांनी विशेष मेहनत घेतली.
