रायगड (प्रतिनिधी): वारंवार निवेदन देऊनही रस्त्यांच्या दुरुस्तीची कोणतीही दखल न घेतल्यामुळे शेतकरी कामगार पक्षाने आज (दि.७) प्रशासनाविरोधात आक्रमक भूमिका घेत पेझारी चेक पोस्ट येथे रास्ता रोको आंदोलन छेडले.
सकाळी नऊ वाजता आंदोलनास सुरुवात झाली असून शेकाप प्रवक्त्या चित्रलेखा पाटील यांच्या नेतृत्वाखाली मोठ्या संख्येने पक्षाचे पदाधिकारी व कार्यकर्ते रस्त्यावर उतरले. या ठिकाणी वाहनांची मोठी कोंडी निर्माण झाली होती. आंदोलनादरम्यान प्रशासनाच्या निष्क्रियतेविरोधात घोषणाबाजी करण्यात आली.
जनतेने अनेक वेळा खड्डेमुक्त रस्त्यांसाठी मागणी केली असतानाही प्रशासनाने दुर्लक्ष केल्याचा आरोप शेकापकडून करण्यात आला. नागरिकांच्या हालअपेष्टा लक्षात घेऊन तात्काळ दुरुस्तीचे काम हाती घ्यावे, अन्यथा आंदोलन अधिक तीव्र करण्यात येईल, असा इशारा शेकापकडून देण्यात आला.
राष्ट्रीय महामार्ग विभागाच्या अधिकाऱ्यांनी आंदोलकांची भेट घेतली आणि दिवाळीपूर्वी रस्त्यांची दुरुस्ती केली जाईल असं आश्वासन दिल्यानंतर आंदोलन स्थगित करण्यात आले. दिवाळीपूर्वी रस्ता सुस्थितीत आला नाही तर अधिक तीव्रतेने आंदोलन करण्याचा इशारा यावेळी देण्यात आला. तब्बल दोन तासानंतर या मार्गावरील वाहतूक पूर्ववत सुरू झाली.
यावेळी शेकाप प्रवक्त्या चित्रलेखा पाटील, शेकाप राज्य महिला आघाडी प्रमुख ॲड. मानसी म्हात्रे, शेकाप जिल्हा सहचिटणीस ॲड. गौतम पाटील, शेकाप जिल्हा चिटणीस मंडळाचे सदस्य अनिल पाटील, शेकाप माजी तालुका चिटणीस अनिल शांताराम पाटील, शेकाप अलिबाग तालुका चिटणीस सुरेश घरत, तालुका सह चिटणीस नरेश म्हात्रे, शेकाप तालुका शेतकरी सभा अध्यक्ष अनिल गोमा पाटील, शेकाप तालुका महिला आघाडी प्रमुख नागेश्वरी हेमाडे, मुरूड तालुका शेकाप तालुका चिटणीस विजय गिदी, विलास म्हात्रे, नागावच्या सरपंच हर्षदा मयेकर, सोनाली मोरे, सुधीर थळे, संजना किर, नागेश कुलकर्णी आदी वेगवेगळ्या आघाड्यांचे पदाधिकारी, कार्यकर्ते, महिला उपस्थित होत्या.
