अलिबाग(प्रतिनिधी): शिवसेना शिंदे गटाचे अलिबाग तालुका प्रमुख अनंत गोंधळी यांच्या सततच्या पाठपुराव्यानंतर अखेर वढाव-खानाव येथील पुलाच्या कामाला गती मिळाली आहे. या पुलाचे काम गेल्या काही महिन्यांपासून रखडले होते, त्यामुळे स्थानिक नागरिकांना मोठ्या अडचणींचा सामना करावा लागत होता. मात्र, गोंधळी यांनी सार्वजनिक बांधकाम विभाग आणि संबंधित अधिकाऱ्यांशी सातत्याने संवाद साधत हे काम तातडीने पूर्ण करण्याची मागणी केली होती.
सध्या पुलाचे काम चोवीस तास युद्धपातळीवर सुरू असून, मशीनरी आणि मनुष्यबळ मोठ्या प्रमाणावर तैनात करण्यात आले आहे. पावसाळ्यापूर्वी हे काम पूर्ण व्हावे, यासाठी गोंधळी स्वतः नियमित पाहणी करत आहेत. पुल पूर्ण झाल्यानंतर वढाव, खानाव, तसेच आसपासच्या गावांतील नागरिकांना मोठा दिलासा मिळणार आहे. वाहतुकीचा वेग वाढेल आणि आपत्कालीन सेवांना सुलभ प्रवेश मिळेल.
शिवसेना शिंदे गटाच्या पुढाकारामुळे हे काम वेगाने सुरू झाल्याबद्दल स्थानिक नागरिकांनी समाधान व्यक्त केले असून, अनंत गोंधळी यांच्या प्रयत्नांचे कौतुक व्यक्त केले आहे. पुलाच्या कामाच्या पूर्णतेनंतर या परिसरातील वाहतुकीचा प्रश्न कायमचा मार्गी लागेल.
