रायगड (प्रतिनिधी): जिल्हा परिषदेतील सत्तासमीकरणाच्या पार्श्वभूमीवर भाजप आणि राष्ट्रवादी काँग्रेसने सदस्यांना गोव्यात हलवल्याची चर्चा राजकीय वर्तुळात रंगली आहे. यावरून मंत्री भरत गोगावले यांनी जोरदार टोला लगावला आहे. “स्वतःच्या सदस्यांवर विश्वास नसल्यामुळेच त्यांना गोव्यात नेण्याची वेळ आली आहे,” अशी टीका त्यांनी केली.
गोगावले म्हणाले की, सत्तास्थापनेसाठी अंकगणित जुळवताना सदस्य फुटीची भीती भाजप-राष्ट्रवादीला सतावत आहे. त्यामुळेच आमिषे आणि दबावाचे राजकारण सुरू असून सदस्यांना सुरक्षित ठिकाणी ठेवण्याचा प्रयत्न केला जात आहे. जनतेने दिलेला कौल डावलून सत्तेसाठी सुरू असलेली धडपड योग्य नाही, असेही त्यांनी स्पष्ट केले.
दरम्यान, जिल्ह्यातील बदलत्या राजकीय घडामोडींमुळे कार्यकर्त्यांमध्ये संभ्रमाचे वातावरण आहे. संभाव्य आघाड्या, पाठिंबा आणि सत्ता स्थापनेबाबत विविध तर्क-वितर्क लावले जात आहेत. येत्या काही दिवसांत चित्र अधिक स्पष्ट होणार असले तरी सध्या आरोप-प्रत्यारोपांनी राजकीय वातावरण तापले आहे.
या सर्व घडामोडींमुळे रायगडच्या राजकारणात चुरस वाढली असून पुढील निर्णयाकडे सर्वांचे लक्ष लागले आहे.
