रायगड (प्रतिनिधी): राजधानी दिल्ली येथे सुरू असलेल्या ‘एआय समिट’दरम्यान काँग्रेस कार्यकर्त्यांनी केलेल्या आंदोलनाचे पडसाद रायगड जिल्ह्यात उमटले. भारतीय जनता पार्टी महिला आघाडीच्या वतीने अलिबाग येथे निषेध आंदोलन करण्यात आले. महिला आघाडीच्या रायगड जिल्हाध्यक्ष चित्रा पाटील यांच्या नेतृत्वाखाली हे आंदोलन पार पडले.
अलिबाग शहरातील प्रमुख ठिकाणी आयोजित या आंदोलनात महिला आघाडीच्या कार्यकर्त्यांनी जोरदार घोषणाबाजी करत काँग्रेसच्या कृतीचा निषेध नोंदवला. आंतरराष्ट्रीय स्तरावर आयोजित ‘एआय समिट’सारख्या महत्त्वाच्या कार्यक्रमादरम्यान आंदोलन करून देशाची प्रतिमा मलिन करण्याचा प्रयत्न केल्याचा आरोप यावेळी करण्यात आला.
चित्रा पाटील यांनी माध्यमांशी बोलताना सांगितले की, देश तंत्रज्ञान आणि कृत्रिम बुद्धिमत्ता क्षेत्रात मोठी झेप घेत असताना अशा प्रकारचे आंदोलन करणे योग्य नाही. “राजकीय मतभेद असू शकतात; मात्र जागतिक व्यासपीठावर देशाची बदनामी होईल अशी भूमिका घेणे अयोग्य आहे,” असे त्या म्हणाल्या. काँग्रेसने या प्रकाराबद्दल जनतेची माफी मागावी, अशी मागणीही त्यांनी केली.
या निषेध आंदोलनात भाजप महिला आघाडीच्या पदाधिकारी व कार्यकर्त्यांची मोठ्या संख्येने उपस्थिती होती. आंदोलनादरम्यान परिसरात काही काळ तणावाचे वातावरण निर्माण झाले होते; मात्र पोलिसांच्या उपस्थितीत कार्यक्रम शांततेत पार पडला.
दरम्यान, काँग्रेसच्या आंदोलनाबाबत जिल्ह्यात राजकीय चर्चा रंगू लागली असून येत्या काळात या मुद्द्यावरून स्थानिक राजकारण तापण्याची चिन्हे दिसत आहेत.
