अलिबाग (प्रतिनिधी) : वर्षभर समुद्रावर अवलंबून असलेल्या मच्छीमार कुटुंबांसाठी नारळी पौर्णिमा हा केवळ धार्मिक सण नसून नव्या मच्छीमारी हंगामाच्या सुरुवातीचा महत्त्वाचा दिवस असतो. नारळी पौर्णिमेनंतर समुद्रातील मच्छीमारीला सुरुवात होत असल्याने अलिबागच्या किनारपट्टीवर सध्या मच्छीमारांची जोरदार लगबग पाहायला मिळत आहे. नव्या हंगामासाठी होड्या, जाळी आणि मच्छीमारीची अन्य साधने सज्ज करण्याचे काम युद्धपातळीवर सुरू आहे.
मच्छीमारी हंगाम सुरू होण्यापूर्वी होड्यांची दुरुस्ती, रंगरंगोटी तसेच इंजिन आणि इतर उपकरणांची तपासणी केली जात आहे. त्याचबरोबर समुद्रात वापरण्यात येणारी जाळी साफ करून ती सुकवण्याचे आणि फाटलेल्या जाळ्यांची डागडुजी करण्याचे काम किनाऱ्यावर सुरू आहे. या कामात मच्छीमार पुरुषांसोबत महिलांचाही मोठा सहभाग असून, लहानांपासून ज्येष्ठांपर्यंत अनेक जण उत्साहाने तयारीत सहभागी झाले आहेत.
समुद्रातून मच्छीमारी करून परतल्यानंतर जाळ्याला शेवाळ, समुद्री कचरा आणि अन्य घटक चिकटलेले असतात. त्यामुळे नव्या हंगामापूर्वी जाळी स्वच्छ करण्याचे काम अत्यंत महत्त्वाचे मानले जाते. जाळी काळजीपूर्वक साफ करून उन्हात वाळवली जाते. फाटलेल्या भागांची अनुभवी मच्छीमारांकडून हाताने शिवण घालून दुरुस्ती केली जाते. जाळ्याची मजबुती आणि योग्य रचना मच्छीमारीच्या दृष्टीने महत्त्वाची असल्याने हे काम कौशल्याने केले जाते.
अलिबागच्या किनाऱ्यावर सध्या कुठे जुन्या जाळ्या उन्हात वाळत घातलेल्या दिसत आहेत, तर कुठे जाळ्यांची सफाई आणि डागडुजी सुरू आहे. काही ठिकाणी होड्यांच्या दुरुस्तीचे कामही अंतिम टप्प्यात आले आहे. नारळी पौर्णिमेच्या दिवशी समुद्राला नारळ अर्पण करून मच्छीमार नव्या हंगामासाठी समुद्रदेवतेचे पूजन करतात आणि सुखरूप, भरघोस मच्छीमारीची प्रार्थना करतात.
नवा हंगाम म्हणजे मच्छीमार कुटुंबांसाठी वर्षभराच्या उदरनिर्वाहाची आशा असते. त्यामुळे नारळी पौर्णिमेपूर्वीची ही लगबग त्यांच्या आर्थिक जीवनाशीही जोडलेली आहे. समुद्र शांत राहावा, चांगली मासळी मिळावी आणि संपूर्ण हंगाम सुखरूप पार पडावा, अशी अपेक्षा मच्छीमारांकडून व्यक्त होत आहे.
