अलिबाग(प्रतिनिधी): अलिबाग आगारातून सकाळी ८.०० वाजता पनवेलकडे रवाना झालेली विनावाहक (शिवशाही) बस अचानक तांत्रिक बिघाडामुळे सांगाव येथे थांबविण्यात आली. बसमध्ये प्रवास करणाऱ्या सर्व प्रवाशांना सुरक्षिततेच्या कारणास्तव खाली उतरविण्यात आले. त्यामुळे प्रवाशांचा मोठा खोळंबा झाला.
बस बंद पडल्याची माहिती मिळताच पर्यायी बसची व्यवस्था करण्यासाठी प्रयत्न सुरू करण्यात आले. मात्र दुसरी बस येण्यास विलंब झाल्याने प्रवाशांना बराच वेळ रस्त्यावरच प्रतीक्षा करावी लागली. यामध्ये नोकरी, व्यवसाय तसेच शैक्षणिक कारणांसाठी प्रवास करणाऱ्या अनेक प्रवाशांचा समावेश होता.
कामाच्या ठिकाणी वेळेत पोहोचणे आवश्यक असलेल्या प्रवाशांना उशीर झाल्याने नाराजी व्यक्त करण्यात आली. काही प्रवाशांनी राज्य परिवहन महामंडळाच्या बसांच्या देखभाल-दुरुस्तीबाबत प्रश्न उपस्थित करत अशा घटना वारंवार घडत असल्याची तक्रार केली.
दरम्यान, पर्यायी बस उपलब्ध झाल्यानंतर प्रवाशांना पुढील प्रवासासाठी रवाना करण्यात आले. या घटनेमुळे सकाळच्या गर्दीच्या वेळेत प्रवाशांना मनस्ताप सहन करावा लागला असून, एसटी प्रशासनाने बसची नियमित तपासणी करून अशा घटना टाळाव्यात, अशी मागणी प्रवाशांकडून करण्यात येत आहे.
