अलिबाग – रायगडच्‍या श्रीवर्धनमधील वेळास इथं तीन तरूणांचा समुद्रात बुडून मृत्‍यू झालाय. आज सकाळची ही घटना आहे. मयुरेश पाटील, अवधूत पाटील आणि हिमांशू पाटील अशी तिघांची नावे असून यामध्‍ये दोघा सख्‍ख्‍या भावांचा समावेश आहे. शेकापचे म्हसळा तालुका चिटणीस संतोष पाटील यांची ही दोन मुलं होती. हे तिघेही तरूण जवळच्‍याच गोंडघर गावातील रहिवासी आहेत. हे तिघेही आज सकाळी 9.30 वाजण्याच्या सुमारास तिघेही वेळास इथल्‍या समुद्रात पोहायला उतरले होते. परंतु पाण्‍याचा अंदाज न आल्‍याने तिघेही बुडाले. याची माहिती मिळताच स्थानिक तरुणांनी घटना स्थळी धाव घेतली. पोलिसांनाही पाचारण करण्यात आले. दिवेआगर येथील वॉटर स्पोर्ट्स चालकांना कॉल झाला. स्थानिक तरूण आणि वॉटरस्‍पोर्टस चालकांनी मदत कार्य करून तिघांनाही बाहेर काढले. परंतु तिघेही मरण पावले होते. तिघांचेही मृतदेह श्रीवर्धन उपजिल्हा रुग्णालयात आणण्यात आले आहेत. या दुर्घटनेमुळे गोंडघर गावावर शोककळा पसरली आहे.
