रायगड (विशेष प्रतिनिधी): रायगड जिल्हा परिषद अंतर्गत आरोग्य विभागात जिल्हा आरोग्य अधिकारी पदावरील गोंधळ अजूनही कायम असून, गेल्या महिनाभरापासून अधिकृततेच्या अभावामुळे विभागात संभ्रमाचे वातावरण आहे. एकाच पदावर दोन अधिकारी कार्यरत असल्याने, आरोग्य प्रशासनात अराजकता पसरली आहे.
जिल्हा आरोग्य अधिकारी म्हणून डॉ. दयानंद सूर्यवंशी यांची अधिकृत नियुक्ती झाली असूनही, त्यांच्या अनुपस्थितीत डॉ. मनिषा विखे या अधिकारी पदाची जबाबदारी पार पाडत आहेत. त्यामुळे कर्मचाऱ्यांमध्ये संभ्रम निर्माण झाला असून, आदेश कुणाचे ऐकायचे आणि काम कुणाचे मानायचे, हा प्रश्न सतावत आहे.
आरोग्य विभागासारख्या अत्यंत महत्त्वाच्या क्षेत्रात असा द्वंद्व निर्माण होणे ही गंभीर बाब मानली जात आहे. शासकीय आदेश आणि अधिकारांच्या स्पष्टतेचा अभाव असल्याने विभागातील निर्णयप्रक्रिया आणि कामकाजावर त्याचा थेट परिणाम होत आहे. कर्मचाऱ्यांमध्येही या गोंधळामुळे नाराजीचे वातावरण असून, अनेकांनी वरिष्ठ पातळीवर याबाबत तक्रारी केल्या आहेत.
जिल्हा परिषदेच्या प्रशासनाकडून या प्रकरणी अद्याप कोणतीही ठोस भूमिका घेण्यात आलेली नाही. त्यामुळे दोन्ही अधिकाऱ्यांमध्ये ‘संगीतखुर्ची’चा प्रकार सुरू असून, दररोज कुणी खुर्चीत बसणार याचा अंदाज लागत नाही. या गोंधळावर लवकरात लवकर तोडगा न निघाल्यास जिल्ह्यातील आरोग्य सेवा कोलमडण्याची भीती व्यक्त होत आहे.
जिल्ह्यातील आरोग्य व्यवस्था सुरळीत ठेवण्यासाठी आणि प्रशासनाच्या कार्यक्षमतेसाठी या पदावरील गोंधळ तातडीने सोडवणे आवश्यक आहे, अशी मागणी आता आरोग्य कर्मचाऱ्यांसह स्थानिक जनतेकडूनही होत आहे.
*********
डॉ. दयानंद सूर्यवंशी हेच रायगड जिल्हा परिषदेचे अधिकृत जिल्हा आरोग्य अधिकारी आहेत. डॉ. मनिषा विखे यांचे सह्या करण्याचे अधिकार काढून घेण्यात आले आहेत. डॉ. विखे यांनी मॅटकडे दाद मागितली आहे. याबाबत २५ जुलै रोजी मॅटमध्ये सुनावणी आहे. या सुनावणीत निकाल लागण्याची शक्यता आहे. त्यानंतर निर्णय घेतला जाईल.
नेहा भोसले, मुख्य कार्यकारी अधिकारी, रायगड जिल्हा परिषद
