रायगड (प्रतिनिधी): देशाचे पंतप्रधान नरेंद्र मोदी आणि त्यांच्या मातोश्रींवर काँग्रेस पक्षाने ए आय प्रणालीचा गैरवापर करून अपमानकारक व्हिडिओ तयार केला व तो सोशल मीडियावर प्रसारित केला असल्याचा गंभीर आरोप भारतीय जनता पक्षाने केला आहे. या प्रकाराचा भाजपा महिला मोर्चाच्या वतीने तीव्र निषेध व्यक्त करण्यात आला.
दक्षिण रायगड जिल्हा भाजपा महिला मोर्चाच्या अध्यक्षा चित्राताई पाटील यांच्या नेतृत्वाखाली पेझारी येथे जोरदार निषेध आंदोलन करण्यात आले. आंदोलक महिलांनी “माता का अपमान नहीं रहेगा हिंदुस्थान” अशा घोषणा देत संताप व्यक्त केला. अलिबाग व वडखळ मार्गावर रॅली काढून काँग्रेस पक्षाचा जाहीर निषेध करण्यात आला. रॅलीदरम्यान काही काळ वाहतूक कोंडी झाली होती.
या आंदोलनात खासदार धैर्यशील पाटील, आमदार प्रशांत ठाकूर, माजी आमदार पंडित पाटील, भाजप नेते आस्वाद पाटील, महिला मोर्चा जिल्हाध्यक्ष चित्राताई पाटील जिल्हा सरचिटणीस भाजप ॲड.महेश मोहीते यांसह अनेक पदाधिकारी व कार्यकर्ते सहभागी झाले होते. महिलांनी काँग्रेस पक्षाच्या कृत्याचा तीव्र शब्दांत निषेध करून अशा असंवेदनशील आणि असभ्य राजकारणाला आळा घालावा, अशी मागणी केली.
चित्राताई पाटील यांनी यावेळी सांगितले की, राष्ट्राचे नेतृत्व करणाऱ्या व्यक्तीवर अशा प्रकारे अन्यायकारक व असंसदीय आरोप करणे हे देशाच्या संस्कृतीला आणि मूल्यांना काळिमा फासणारे आहे. महिला मोर्चा अशा कृतींविरुद्ध जनतेला जागरूक करत राहील व राष्ट्राच्या सन्मानासाठी संघर्ष करत राहील.
या निषेध आंदोलनामुळे परिसरात मोठी खळबळ उडाली असून नागरिकांनीही या घटनेविरुद्ध संताप व्यक्त केला आहे. भाजपा महिला मोर्चाने अशा अपमानास्पद कृत्यांविरोधात एकजूट दाखवत आपल्या राष्ट्रीय भावना व मातृमान राखण्याचा संकल्प केला.
