रायगड (खास प्रतिनिधी): रायगडच्या महायुतीतील मतभेद पुन्हा एकदा उघड झाले आहेत. पाली नगराध्यक्ष पदाच्या निवडणुकीत राष्ट्रवादी काँग्रेसने फसवणूक केल्याचा गंभीर आरोप आमदार महेंद्र दळवी यांनी केला आहे. “फसवणुकीची परंपरा राष्ट्रवादीने कायम ठेवली आहे,” असे म्हणत त्यांनी तीव्र शब्दांत नाराजी व्यक्त केली. यावेळी त्यांचा रोख खासदार सुनील तटकरे यांच्याकडे होता.
आमदार दळवी यांनी राष्ट्रवादीच्या भूमिकेवर टीका करत सूचक इशारा दिला की, “विश्वासघात सहन केला जाणार नाही. महायुतीतील सहकार्य टिकून राहावे पण राष्ट्रवादीच्या वर्तनामुळे त्याला धोका निर्माण होत आहे. पाली नगराध्यक्ष पदावर आमचा हक्क होता पण राष्ट्रवादीने आम्हाला फसवले आम्ही देखील आगामी निवडणुकीत यावर भूमिका घेऊ ” त्यांचा हा इशारा राजकीय वर्तुळात खळबळ माजवणारा ठरला आहे.
पाली नगरपालिकेतील निवडणुकीनंतर स्थानिक पातळीवर असंतोष वाढला असून, महायुतीतील इतर घटक पक्षांमध्येही नाराजीचे सूर ऐकू येत आहेत. यामुळे आगामी स्थानिक स्वराज्य संस्थांच्या निवडणुकांवर परिणाम होण्याची शक्यता वर्तवली जात आहे.
राष्ट्रवादी काँग्रेसकडून अद्याप यावर अधिकृत प्रतिक्रिया आलेली नाही. मात्र, दळवी यांच्या वक्तव्यानंतर जिल्ह्यात राजकीय चर्चा रंगल्या असून, महायुतीतील समन्वय आणि परस्पर विश्वासावर प्रश्न निर्माण झाले आहेत.
