अलिबाग (प्रतिनिधी): शनिवारच्या पावसाचा शहरातील दैनंदिन जनजीवनावर कोणताही विशेष परिणाम दिसून आला नाही. सर्व व्यवहार सुरळीत सुरू राहिले. मात्र, नवरात्रोत्सवाच्या उत्साहावर पावसाचे सावट गडद झाले असून तरुणाईसह उत्सवप्रेमींचा हिरमोड झाला आहे.
नवरात्रोत्सवाच्या निमित्ताने उभारण्यात आलेल्या मंडपांमध्ये पावसाचे पाणी साचल्याने चिखल निर्माण झाला आहे. त्यामुळे रात्री होणारे रासगरबा, दांडिया यासह सांस्कृतिक व मनोरंजनाचे कार्यक्रम अडचणीत आले आहेत. अनेक ठिकाणी आयोजकांना अचानक कार्यक्रम रद्द करण्याचा निर्णय घ्यावा लागला. या पार्श्वभूमीवर विशेष तयारी करून उत्सवाची रंगत वाढविण्याची आशा बाळगलेल्या युवक-युवतींना निराश व्हावे लागत आहे.
काही ठिकाणी दांडिया स्पर्धांचेदेखील आयोजन करण्यात आले होते. मात्र, पावसाच्या विघ्नामुळे या स्पर्धा कशा पार पाडायच्या, याचा प्रश्न आयोजकांसमोर उभा राहिला आहे. काही समित्यांनी पर्यायी ठिकाणांचा विचार सुरू केला असला तरी मोठ्या प्रमाणावर लोकांची गर्दी होणार असल्याने योग्य व्यवस्था करणे आव्हानात्मक ठरत आहे.
हवामान खात्याने पुढील तीन दिवस पाऊस कायम राहील, असा अंदाज वर्तवला आहे. त्यामुळे उत्सवाच्या शिल्लक दिवसांतही कार्यक्रम सुरळीत पार पडतील का, याबाबत आयोजकांसह भाविकांमध्ये संभ्रम आहे. विशेषतः ग्रामीण भागात मंडपाभोवती चिखल व पाणथळ जागा निर्माण झाल्याने महिलांनाही त्रास सहन करावा लागत आहे.
नवरात्रोत्सव हा भक्ती, उत्साह आणि आनंदाने साजरा होणारा सण आहे. मात्र, पावसाच्या व्यत्ययामुळे उत्सवाची रंगत काहीशी कमी झाली आहे. आयोजक पावसाचा सामना करत उत्सवाचे आयोजन सुरळीत पार पाडण्यासाठी पर्यायी उपाययोजना शोधत आहेत, परंतु पावसाचा जोर कायम राहिल्यास या वर्षीच्या नवरात्रोत्सवात नेहमीसारखी चमक दिसेल की नाही, याबाबत शंका निर्माण झाली आहे.
