अलिबाग (प्रतिनिधी): अलिबाग शहरातील सर्वांना आपुलकीने जोडणारे व्यक्तिमत्व संतोष गोपाळ वागळे (उर्फ राजू) यांचे अल्पशा आजाराने निधन झाले. त्यांच्या निधनाने शहरातील सामाजिक, राजकीय व सांस्कृतिक वर्तुळात शोककळा पसरली आहे.
स्वभावाने हसतमुख व मदतीस तत्पर असलेल्या राजू वागळे यांनी अनेक गरजू व्यक्तींना दिलासा दिला होता. त्यांच्या आठवणींमुळे नागरिकांच्या मनात कायमचे स्थान त्यांनी मिळवले. त्यांच्या निधनाची बातमी कळताच परिचित, मित्रमंडळी व नागरिक मोठ्या संख्येने अंत्यदर्शनासाठी दाखल झाले.
अलिबागचे माजी नगराध्यक्ष प्रशांत नाईक यांनी भावपूर्ण श्रद्धांजली अर्पण करताना म्हटले की, “राजू वागळे हे अलिबागच्या प्रत्येक घटनेत सहभागी होऊन आनंदी वातावरण निर्माण करणारे होते. त्यांचे योगदान आणि प्रेमळ स्वभाव नेहमीच स्मरणात राहतील.”
शहरातील विविध राजकीय, सामाजिक संघटनांनीही वागळे यांच्या निधनाबद्दल शोक व्यक्त केला आहे. त्यांच्या निधनामुळे अलिबागने एक जिव्हाळ्याचा मित्र गमावला असल्याचे अनेकांनी सांगितले.
वागळे यांच्या निधनामुळे शहरात शोककळा पसरली असून, अंत्यसंस्कारासाठी नागरिकांनी मोठ्या संख्येने हजेरी लावली.
