रायगड (प्रतिनिधी) : आगामी जिल्हा परिषद निवडणुकीच्या पार्श्वभूमीवर शिवसेनेने आपली पहिली महत्त्वपूर्ण चाल खेळली आहे. आमदार महेंद्र दळवी यांनी जिल्हा प्रमुख राजा केणी यांच्या उमेदवारीची घोषणा करताच राजकीय वातावरणात चैतन्य निर्माण झाले आहे. नव्याने झालेल्या आंबेपूर (पूर्वी कुडूस) मतदारसंघातून राजा केणी उमेदवारी दाखल करणार असल्याचे त्यांनी जाहीर केले.
महेंद्र दळवी यांनी स्पष्ट केले की, या मतदारसंघावर शिवसेनेचे वर्चस्व कायम राहिले आहे. मागील सर्व निवडणुकांत या मतदारसंघातील मतदारांनी शिवसेनेवर विश्वास दाखवला असून, त्याच विश्वासाच्या जोरावर यावेळीही विजय मिळवण्याचा आत्मविश्वास त्यांनी व्यक्त केला. महायुती झाली तरी या मतदारसंघात शिवसेनेचाच दावा राहील, असे सांगून दळवी यांनी आपली भूमिका स्पष्ट केली.
राजा केणी हे गेल्या अनेक वर्षांपासून संघटनात्मक कार्यात सक्रिय असून, जिल्ह्यातील विविध सामाजिक, राजकीय प्रश्नांवर त्यांनी ठाम भूमिका घेतली आहे. त्यांचा जम बसलेला जनसंपर्क आणि संघटनशक्ती लक्षात घेता पक्षाने त्यांच्यावर विश्वास दाखवला आहे. मतदारसंघातील विकासकामे, स्थानिकांशी असलेली नाळ आणि सातत्याने केलेली जनसंपर्काची मोहीम यामुळे केणींची उमेदवारी पक्षासाठी महत्त्वपूर्ण ठरणार आहे.
या घोषणेनंतर शिवसेना कार्यकर्त्यांमध्ये उत्साहाचे वातावरण असून, आगामी निवडणुकीत मतदारसंघात लढतीची रंगत वाढण्याची चिन्हे दिसत आहेत. महायुतीच्या चर्चेतून काहीही निष्पन्न झाले तरी आंबेपूर मतदारसंघातून शिवसेनेचाच उमेदवार उभा राहील, हे आता निश्चित झाले आहे.
