अलिबाग (विशेष प्रतिनिधी): अलिबाग–पेण मार्गावरील परिसरात इंडियन ऑईल पेट्रोल पंपासमोर शनिवारी (दि. ४) पहाटेच्या सुमारास स्कॉर्पिओ गाडीचा भीषण अपघात झाला. कारचालकाचे नियंत्रण सुटल्याने वाहन चुकीच्या दिशेने जाऊन रस्त्यालगतच्या विजेच्या खांबावर जोरदार धडकले. या अपघातानंतर चालकाने गाडी घटनास्थळीच सोडून दिली आणि पसार झाला.
सकाळी स्थानिक नागरिकांच्या निदर्शनास ही बाब आल्यानंतर त्यांनी त्वरित पोलिसांना कळवले. पोलिसांनी घटनास्थळी धाव घेऊन तपास सुरू केला असून, गाडीच्या नोंदणी क्रमांकाच्या आधारे मालकाचा शोध घेतला जात आहे. मात्र, बातमी लिहीपर्यंत गाडीचा मालक वा चालक दोघांपैकी कोणाचाही ठावठिकाणा लागलेला नव्हता. या घटनेमुळे परिसरात विविध चर्चांना उधाण आले आहे.
