अलिबाग (प्रतिनिधी): स्वच्छ आणि सुंदर गावाचे स्वप्न साकार करण्यासाठी “स्वच्छ मांडवा – सुंदर मांडवा” या उपक्रमाअंतर्गत एक महत्त्वपूर्ण पाऊल उचलण्यात आले आहे. श्री कनकेश्वर तीर्थ क्षेत्राच्या पायथ्याशी लायन्स क्लब मांडवा यांच्या वतीने सन २०२५-२६ साठी कायमस्वरूपी कचराकुंडी स्थापनेचा उपक्रम राबविण्यात आला आहे. या उपक्रमामुळे पर्यटक आणि स्थानिक नागरिकांना स्वच्छतेची जाणीव राहील तसेच परिसरात स्वच्छतेचा आदर्श निर्माण होईल.
या उपक्रमाचे प्रायोजकत्व अध्यक्ष अलिबाग, मुरुड, चणेरा विधानसभा मतदारसंघ राष्ट्रवादी काँग्रेस पक्षाचे अमित नाईक आणि आद्य प्रतिष्ठान, म्हात्रोळी–सारळ यांनी सौजन्याने केले आहे. त्यांच्या सहकार्यामुळे हा प्रकल्प प्रत्यक्षात साकारला गेला.
लायन्स क्लब मांडवा यांच्या सदस्यांनी या उपक्रमात सक्रिय सहभाग घेत स्वच्छतेसाठी गावकऱ्यांना जनजागृती केली. “गावाच्या स्वच्छतेसाठी प्रत्येक नागरिकाने पुढाकार घेणे अत्यंत गरजेचे आहे. स्वच्छता ही केवळ मोहिम नसून एक संस्कार आहे,” असे या वेळी उपस्थित मान्यवरांनी सांगितले.
या प्रकल्पाद्वारे गावाच्या विविध ठिकाणी कायमस्वरूपी कचराकुंड्या बसविण्यात येणार असून नियमित स्वच्छता मोहीम, कचरा वर्गीकरण आणि प्लास्टिकविरोधी जनजागृतीही केली जाणार आहे.
लायन्स क्लब मांडवा, स्थानिक ग्रामस्थ आणि सामाजिक संस्थांच्या संयुक्त प्रयत्नातून मांडवा गाव स्वच्छतेच्या दिशेने एक आदर्श निर्माण करेल, अशी आशा व्यक्त करण्यात आली. “स्वच्छ मांडवा – सुंदर मांडवा” हा उपक्रम नागरिकांच्या सहभागातून सशक्त आणि टिकाऊ स्वच्छतेच्या संस्काराची नवी परंपरा निर्माण करेल, असा विश्वास आयोजकांनी व्यक्त केला.
