रायगड (प्रतिनिधी): राज्यातील जिल्हा परिषदा, पंचायत समित्या तसेच नगरपरिषदा आणि नगरपंचायतींच्या आगामी सार्वत्रिक निवडणुकांच्या तयारीला सुरुवात झाली असून, राज्य निवडणूक आयोगाकडून प्रारूप मतदार यादी आज अधिकृतपणे जाहीर करण्यात आली आहे. नागरिकांना या यादीत आपले नाव तपासण्याची आणि पडताळणी करण्याची सुविधा ऑनलाइन उपलब्ध करून देण्यात आली आहे.
या निवडणुकांसाठी राज्य निवडणूक आयोगाने 1 जुलै 2025 हा अधिसूचित दिनांक निश्चित केला आहे. त्या दिवशी अस्तित्वात असलेली विधानसभेची मतदार यादीच जिल्हा परिषद, पंचायत समिती तसेच नगरपरिषद आणि नगरपंचायतींच्या निवडणुकांसाठी आधार म्हणून वापरण्यात आली आहे. त्यानुसार तयार झालेल्या प्रारूप मतदार यादीत नाव शोधण्यासाठी https://mahasecvoterlist.in या संकेतस्थळावर थेट शोध घेता येणार आहे. याशिवाय, राज्य निवडणूक आयोगाच्या अधिकृत संकेतस्थळावर https://mahasec.maharashtra.gov.in देखील ही लिंक उपलब्ध आहे.
प्रारूप मतदार यादीची छायांकित प्रत जिल्हा परिषद आणि पंचायत समितींसाठी संबंधित तहसील कार्यालयांमध्ये तसेच नगरपरिषद आणि नगरपंचायतींसाठी त्यांच्या संबंधित कार्यालयांमध्ये पाहण्यासाठी उपलब्ध करून देण्यात आली आहे. यादीच्या प्रतिपृष्ठासाठी नागरिकांना दोन रुपये शुल्क भरावे लागेल.
तसेच, प्रारूप आणि अंतिम मतदार यादीची विनाछायाचित्र पीडीएफ प्रत ऑनलाइन स्वरूपातही उपलब्ध आहे. त्यामुळे नागरिकांना आपल्या घरबसल्या मतदार यादीत आपले नाव आहे का याची खात्री करून घेणे अधिक सोपे झाले आहे.
निवडणूक आयोगाने नागरिकांना आवाहन केले आहे की, त्यांनी वेळेत आपले नाव तपासावे आणि जर काही त्रुटी आढळल्यास त्या दुरुस्तीसाठी आवश्यक अर्ज सादर करावेत. आगामी स्थानिक स्वराज्य संस्थांच्या निवडणुकांमध्ये आपला मतदानाचा हक्क बजावण्यासाठी ही प्रक्रिया महत्त्वाची असल्याचेही आयोगाने स्पष्ट केले आहे.
