रायगड (प्रतिनिधी): महाराष्ट्रासाठी अभिमानाची बाब म्हणजे राज्यातील पाच समुद्रकिनाऱ्यांना प्रतिष्ठेचा ‘ब्लू फ्लॅग पायलट’ हा आंतरराष्ट्रीय दर्जा प्राप्त झाला आहे. यामध्ये रायगड जिल्ह्यातील श्रीवर्धन आणि नागाव, रत्नागिरीतील गुहागर आणि लाडघर, तसेच पालघर जिल्ह्यातील पर्णका (डहाणू) या समुद्रकिनाऱ्यांचा समावेश आहे.
‘ब्लू फ्लॅग पायलट’ हा किनाऱ्याला मिळणारा उत्तम गुणवत्ता आणि सुरक्षिततेचा प्रमाणित दर्जा आहे. ज्या समुद्रकिनाऱ्यावर हा ध्वज फडकतो, तो किनारा जगातील सर्वोत्तम, स्वच्छ आणि सुरक्षित किनाऱ्यांपैकी एक मानला जातो. “ब्ल्यू फ्लॅग इंडिया” संस्थेकडून घोषित करण्यात आलेला हा दर्जा या किनाऱ्यांच्या सर्वांगीण विकासासाठी आणि पर्यावरणपूरक धोरणांच्या दिशेने उचललेले मोठे पाऊल मानले जात आहे.
या मानांकनामुळे श्रीवर्धनसह इतर चार किनारे पूर्ण ‘ब्ल्यू फ्लॅग’ दर्जा मिळवण्यासाठी सज्ज झाले आहेत. हे यश महाराष्ट्र शासनाच्या शाश्वत व जबाबदार पर्यटनाला चालना देणाऱ्या दूरदृष्टीपूर्ण धोरणांचे फलित असल्याचे मानले जात आहे. आगामी काळात या समुद्रकिनाऱ्यांवर जागतिक दर्जाच्या सुविधा उपलब्ध होणार असून, त्यामुळे पर्यटन वाढीस लागेल आणि स्थानिक रोजगाराच्या नव्या संधी निर्माण होतील.
‘ब्लू फ्लॅग पायलट’ दर्जा मिळाल्याने महाराष्ट्राच्या किनारपट्टीचा विकास आणि पर्यावरण संरक्षण या दोन्ही क्षेत्रात एक नवा अध्याय सुरू झाला आहे.
