अलिबाग(प्रतिनिधी): महाराष्ट्रातील बंजारा समाजाला अनुसूचित जमाती (एसटी) आरक्षणाच्या यादीत समाविष्ट करण्याच्या मागणीसाठी रायगड जिल्ह्यातील बंजारा समाजाने शुक्रवारी (दि.१०) जिल्हाधिकारी कार्यालयावर मोर्चा काढला. सकल बंजारा आरक्षण समितीच्या नेतृत्वाखाली झालेल्या या मोर्चात मोठ्या संख्येने बंजारा बांधव सहभागी झाले होते.
सध्या बंजारा समाज विमुक्त जाती प्रवर्गात समाविष्ट असून, अनेक राज्यांमध्ये या समाजाचा समावेश अनुसूचित जमातीत करण्यात आला आहे. त्यामुळे महाराष्ट्रातही संविधानाच्या अनुच्छेद ३४२ (२) नुसार बंजारा समाजाचा एसटी यादीत स्वतंत्र समावेश करावा, अशी मागणी समितीकडून करण्यात आली. “आम्हाला कुणाच्याही हक्काचे आरक्षण नको; विमुक्त भटकी जमात प्रवर्गातील तीन टक्के आरक्षण आम्हाला एसटी प्रवर्गातून हवे,” असा पुनरुच्चारही नेत्यांनी केला.
तथापि, या मोर्चादरम्यान समाजातील कामगार, मजूर आणि उच्चशिक्षित नोकरदार वर्गात नाराजीचे सूर उमटले. आरक्षणाबाबत चर्चा होत असली तरी दैनंदिन रोजगार, मजुरांचे प्रश्न, आणि शासन योजनांच्या अंमलबजावणीसंबंधी मुद्दे या आंदोलनातून शासनदरबारी पोहोचलेच नाहीत, अशी खंत अनेकांनी व्यक्त केली. “आमचे प्रश्न अजूनही पूर्ववत आहेत, आरक्षणाच्या घोषणांपेक्षा आमच्या जगण्याच्या अडचणी अधिक तीव्र आहेत,” असे मत काही कार्यकर्त्यांनी आंदोलनादरम्यान मांडले.
दरम्यान, कोणत्याही अनुचित प्रकाराला आळा घालण्यासाठी पोलिसांनी जिल्हाधिकारी कार्यालय परिसरात कडेकोट बंदोबस्त ठेवला होता. शांततेत पार पडलेल्या या मोर्चाने समाजाच्या आरक्षणाच्या प्रश्नाबरोबरच कामगार वर्गाच्या उपेक्षेचाही मुद्दा पुढे आणला आहे.
