अलिबाग (प्रतिनिधी): रायगड जिल्ह्यातील कामगार वर्गासाठी ऐतिहासिक ठरणारा क्षण आज शनिवारी (दि. ११ ऑक्टोबर २०२५) सकाळी १०.३० वाजता साकारला. अलिबाग येथे नव्याने उभारण्यात आलेल्या कामगार न्यायालय रायगड-अलिबागचे भव्य उद्‌घाटन उच्च न्यायालय मुंबईचे माननीय न्यायमूर्ती श्री. मिलिंद जाधव यांच्या हस्ते संपन्न झाले.
हा सोहळा कामगार न्यायालय, नियोजन भवन, जिल्हाधिकारी कार्यालय, अलिबाग येथे पार पडला. कार्यक्रमाच्या अध्यक्षस्थानी उद्योग न्यायालय महाराष्ट्र, मुंबईचे अध्यक्ष विजयकुमार प्रसाद पाटकर होते. तसेच रायगड जिल्हा लेबर कोर्ट प्रॅक्टिसनर्स बार असोसिएशन महाडचे अध्यक्ष ॲड. विजय मेहता, रायगड जिल्हा व अलिबाग वकील संघाचे अध्यक्ष ॲड. प्रसाद एस. पाटील, तसेच कामगार न्यायाधीश जी. एस. हांगे यांचीही उपस्थिती लाभली.
या न्यायालयाच्या स्थापनेमुळे रायगड जिल्ह्यातील कामगार व औद्योगिक वादांच्या सोडवणुकीसाठी स्थानिक पातळीवरच न्याय मिळण्याचा मार्ग खुला झाला आहे. आतापर्यंत कामगारांना आपले प्रकरण मांडण्यासाठी मुंबई किंवा इतर ठिकाणी जावे लागत होते, मात्र आता अलिबागमध्येच न्याय मिळणार असल्याने वेळ, पैसा आणि श्रम यांची मोठी बचत होणार आहे.
उद्‌घाटनप्रसंगी मान्यवरांनी आपल्या भाषणात सांगितले की, न्यायालयीन व्यवस्थेचे विकेंद्रीकरण हे न्यायप्रविष्टतेच्या दिशेने मोठे पाऊल आहे. कामगार वर्गाच्या हक्कांचे रक्षण आणि औद्योगिक शांततेसाठी अशा न्यायालयांची भूमिका महत्त्वाची आहे.
रायगड जिल्ह्यातील उद्योग आणि कामगारांसाठी हे न्यायालय वरदान ठरणार असून, वादांचे जलदगतीने आणि न्याय्य पद्धतीने निराकरण होईल, असा विश्वास व्यक्त करण्यात आला. न्यायप्रविष्टतेचा अधिकार प्रत्येक कामगाराचा मूलभूत हक्क असून, त्यासाठी न्यायालयीन सुविधा स्थानिक पातळीवर उपलब्ध करून देणे ही शासनाची जबाबदारी असल्याचेही यावेळी अधोरेखित करण्यात आले.
या नव्या न्यायालयाच्या उद्‌घाटनामुळे रायगड जिल्ह्यात न्यायप्रणाली अधिक सक्षम आणि सर्वसमावेशक होणार असून, कामगार न्यायासाठीच्या प्रयत्नांना नवे बळ मिळाले आहे.
