अलिबाग(प्रतिनिधी): अलिबाग तालुक्यात २६ ते २८ सप्टेंबर आणि २१ ते २८ ऑक्टोबर २०२५ दरम्यान झालेल्या अवकाळी वादळी पावसामुळे शेतकऱ्यांचे भात पिक तसेच सुपारी बागांचे मोठ्या प्रमाणात नुकसान झाले आहे. या अवकाळी पावसामुळे पूर्ण तयार झालेले भात पिक पाण्यात आडवे पडून कणसे मोडली असून, अनेक शेतकऱ्यांच्या कापणीस ठेवलेल्या भाताचाही नुकसान झाला आहे.
अलिबाग तालुक्यातील बहुतांश शेतकरी वर्षातून एकदाच भात उत्पादन घेतात. त्यामुळे या पिकाच्या नुकसानीमुळे त्यांच्यावर उपासमारीची वेळ आली आहे. चौल, रेवदंडा, नागाव परिसरातील सुपारी उत्पादकांचेही मोठे नुकसान झाल्याचे निदर्शनास आले आहे.
शेतकऱ्यांचे झालेले नुकसान लक्षात घेऊन शासनाने तात्काळ सरसकट पंचनामे करून, नुकसानग्रस्त शेतकऱ्यांच्या खात्यात नुकसान भरपाईची रक्कम जमा करावी, अशी मागणी करण्यात आली आहे. तसेच रायगड जिल्ह्यातील इतर भागातील भात, सुपारी, आंबा व इतर पिकांचे नुकसान झालेल्या शेतकऱ्यांनाही आर्थिक मदत देण्याचे आवाहन करण्यात आले आहे.
याप्रसंगी शेतकरी कामगार पक्षाच्या राज्य महिला आघाडी प्रमुख एडवोकेट मानसी म्हात्रे, शेतकरी कामगार पक्षाच्या राज्यप्रवक्त्या चित्रलेखा पाटील, अलिबागचे माजी नगराध्यक्ष प्रशांत नाईक, माजी नगरसेवक प्रदीप नाईक, अलिबाग तालुका शेतकरी सभा अध्यक्ष अनिल गोमा पाटील, एडवोकेट गौतम पाटील, सुरेश घरत यांच्यासह अन्य पदाधिकारी कार्यकर्ते मोठ्या संख्येने उपस्थित होते.
