अलिबाग(प्रतिनिधी): अलिबाग ते रोहा रस्‍त्‍याची पार दुरवस्‍था झाली आहे. अर्धवट राहिलेल्‍या या रस्‍त्‍याच्‍या दुरूस्‍तीच्‍या कामाला तातडीने सुरूवात करावी अशी मागणी सार्वजनिक बांधकाम विभागाकडे करण्‍यात आली आहे. 10 नोव्‍हेंबरपर्यंत काम सुरू झाले नाही तर स्‍वखर्चाने आणि श्रमदानातून दुरूस्‍ती करण्‍याची तयारी येथील ग्रामस्‍थांनी दाखवली आहे.
शिवसेनेचे अलिबाग तालुकाप्रमुख अनंत गोंधळी यांच्या नेतृत्‍वाखालील परीसरातील ग्रामस्‍थांच्‍या शिष्‍टमंडळाने आज सार्वजनिक बांधकाम विभागाच्‍या कार्यकारी अभियंता एम. एम. धायतडक यांची भेट घेतली.या मार्गावरील वेलवली ते वावे फाटापर्यंतच्‍या रस्‍त्‍याची पार दुर्दशा झाली असून या मार्गावरून वाहन चालवणे केवळ अशक्‍य झाले आहे. रस्त्यावर मोठमोठे खड्डे पडलेले असून प्रवास करताना गरोदर महिला, विद्यार्थी, वयोवृध्द प्रवासी यांचे प्रचंड प्रमाणात हाल होत आहेत. खड्यांमुळे अपघातांचे प्रमाणसुध्दा वाढलेले आहेत. किंबहुना या रस्त्यावर मोठमोठे अपघात होवून जिवीत हानी होण्याची दाट शक्यता निर्माण झाली असल्‍याची भीती यावेळी व्‍यक्‍त करण्‍यात आली.
या रस्त्याचे दुरुस्तीचे काम १० नोव्हेंबर पासून चालू करावे. असे न केल्यास हे काम आम्ही ग्रामस्थ स्वखर्चातून व आमच्या श्रमदानातून १२ नोव्हेंबर पासून चालू करू पुढे काही झाल्यास त्यास पूर्णपणे आपले विभागीय कार्यालय जबाबदार राहील असेही या शिष्‍टमंडळाने दिलेल्‍या निवेदनात नमूद करण्‍यात आले आहे.
ठेकेदाराने जे काम केलं आहे त्‍याचे बहुतांश बिल अदा करण्‍यात आले आहे परंतु उर्वरीत रकमेसाठी तो काम करत नाही अशी माहिती बांधकाम विभागाच्‍या अधिकारयांनी दिल्‍याचे अनंत गोंधळी यांनी सांगितले. असं असेल तर प्रवाशांच्‍या जीवाशी खेळणारया ठेकेदाराला काळ्या यादीत टाकावे. जर 10 नोव्हेंबर पर्यंत काम सुरू झाले नाही तर आम्ही दुरूस्‍तीचे काम स्‍वखर्चाने करू असा इशारा शिवसेना तालुकाप्रमुख अनंत गोंधळी यांनी दिला आहे.
