रायगड (प्रतिनिधी): नवी मुंबई येथून पर्यटनासाठी आलेल्या चार मित्रांपैकी दोन तरुण अलिबाग येथील समुद्रात बेपत्ता झाल्याची घटना शनिवारी (दि. १) संध्याकाळी घडली. दोन्ही तरुणांचा रात्री उशिरापर्यंत शोध घेण्यात आला, मात्र ते सापडले नाही. शशांक सिंग (वय १९, राहणार – उलवे, नवी मुंबई) आणि पलाश पखर (वय १९, राहणार – सानपाडा, नवी मुंबई) अशी बेपत्ता तरुणांची नावे आहेत.
मिळालेल्या प्राथमिक माहितीनुसार,चार मित्र संध्याकाळी ६:३० वाजता अलिबाग समुद्रकिनारी फेरफटका मारण्यासाठी गेले होते. त्यापैकी एक मित्र लांब खडकावर गेला असता त्याचा तोल गेला आणि तो पाण्यात पडला. मदतीसाठी त्याने मित्रांना हाक मारली. हे पाहून दुसऱ्या मित्राने त्याला वाचवण्याचा प्रयत्न केला, मात्र दोघेही पाण्यात गटांगळ्या खाऊ लागले. तिसऱ्या मित्राने त्यांना बाहेर काढण्याचा प्रयत्न केला, पण यश आले नाही. शेवटी त्यांनी आरडाओरड करून जवळच क्रिकेट खेळणाऱ्या मुलांना घटनेची माहिती दिली. त्या क्रिकेट खेळणाऱ्या मुलांनी बुडालेल्या मुलांना वाचविण्याचा प्रयत्न केला. परंतु लाटांच्या मंत्र्यांमध्ये बुडालेल्या दोन्ही तरुणांचा किनाऱ्यावर उभे असलेल्या तरुणांना थांगपत्ता लागला नाही. त्यांनी तातडीने अलिबाग पोलिसाना घडलेली घटना सांगितली. 
सदर घटनेची माहिती पोलिसांना दिल्यानंतर अलिबाग पोलीस निरीक्षक किशोर साळे आणि तहसीलदार विक्रम पाटील यांनी तात्काळ घटनास्थळी धाव घेतली. स्थानिकांच्या मदतीने बोट, जेट-स्की आणि ड्रोनच्या साहाय्याने शोध मोहीम राबवली गेली. मात्र, या तरुणाचा रात्री उशिरापर्यंत थांगपत्ता लागला नाही. शोधकार्य सुरू असल्याची माहिती पोलिसांनी दिली. घटना घडून २४ तास उलटून गेलेतरी अद्याप बेपत्ता तरुणांनाच थांगपत्ता लागला नसल्याने यंत्रणा या बेपत्ता तरुणांनाच शोध घेत आहे.
