कर्जत (प्रतिनिधी): आगामी नगरपरिषद निवडणुकीच्या पार्श्वभूमीवर जिल्हाधिकारी किशन जावळे यांनी आज कर्जत नगरपरिषद कार्यालयाला भेट देऊन निवडणूकपूर्व तयारीचा सविस्तर आढावा घेतला.
या वेळी जिल्हा पोलीस अधीक्षक आंचल दलाल, तहसिलदार धनंजय जाधव, नगरपरिषदेचे मुख्याधिकारी तसेच निवडणूक शाखेतील संबंधित अधिकारी उपस्थित होते.
जिल्हाधिकारी जावळे यांनी मतदान केंद्रांच्या सुविधा, मतदार याद्या, सुरक्षा व्यवस्था, तसेच निवडणूक साहित्याच्या साठवणुकीसंदर्भात अधिकारी वर्गाशी चर्चा केली. त्यांनी प्रत्येक टप्प्यावर अचूक नियोजन करून पारदर्शक आणि सुरळीत निवडणूक प्रक्रिया राबविण्याच्या सूचना दिल्या.
पोलीस अधीक्षक आंचल दलाल यांनी या वेळी संवेदनशील आणि अतिसंवेदनशील मतदान केंद्रांवरील सुरक्षा व्यवस्थेबाबत सविस्तर माहिती दिली. मतदानाच्या दिवशी कायदा-सुव्यवस्था अबाधित राखण्यासाठी आवश्यक तैनाती करण्यात येणार असल्याचे त्यांनी सांगितले.
तहसिलदार धनंजय जाधव यांनी निवडणूक तयारीसंबंधी प्रशासनाच्या कामकाजाचा आढावा सादर करताना सर्व आवश्यक साहित्य आणि मनुष्यबळाची उपलब्धता सुनिश्चित केल्याचे सांगितले.
या भेटीदरम्यान जिल्हाधिकारी जावळे यांनी निवडणुकीसंदर्भातील कामकाज वेळेत पूर्ण करण्यावर भर दिला आणि सर्व अधिकारी व कर्मचाऱ्यांना समन्वयाने काम करण्याचे निर्देश दिले.
