अलिबाग(प्रतिनिधी): अलिबाग नगराध्यक्ष पदाच्या निवडणुकीत राष्ट्रवादी काँग्रेसच्या वरिष्ठ नेत्याच्या पत्नीची अपक्ष एन्ट्री सध्या चर्चेचा केंद्रबिंदू ठरली आहे. राष्ट्रवादी काँग्रेस पक्षाचे प्रदेश कार्यकारिणी सदस्य प्रवीण मधुकर ठाकूर यांच्या पत्नी कविता ठाकूर यांनी अपक्ष उमेदवारी अर्ज दाखल केल्याने महायुतीच्या अंतर्गत समन्वयावर प्रश्नचिन्ह निर्माण झाले आहे. विशेष म्हणजे, अर्ज दाखल करताना प्रवीण ठाकूर अनुपस्थित असल्याची नोंद आहे, ज्यामुळे या उमेदवारीला आणखी राजकीय रंग चढला आहे.
नगराध्यक्ष पदासाठी आतापर्यंत सहा महिला उमेदवार रिंगणात उतरल्या आहेत. शेकापकडून अक्षया नाईक व मानसी म्हात्रे, भाजपकडून तनुजा पेरेकर व वैशाली बंगेरा, शरद पवार गटाकडून भारती रणवरे यांनी नामनिर्देशन दाखल केले आहे. या पार्श्वभूमीवर कविता ठाकूर यांची अपक्ष उमेदवारी ही अनपेक्षित राजकीय चाल मानली जात असून, महायुतीच्या मतांवर त्याचा थेट परिणाम होऊ शकतो, अशी चर्चा राजकीय वर्तुळात सुरू आहे.
भाजप–शिवसेना उमेदवारांसाठी ही परिस्थिती अडचणीची ठरू शकते, तर राष्ट्रवादी काँग्रेसच्या अंतर्गत नाराजीचे संकेतही व्यक्त केले जात आहेत. सहा महिला उमेदवारांमुळे अलिबागची ही निवडणूक अधिक चुरशीची होणार असून, कविता ठाकूर यांच्या अचानक प्रवेशामुळे निवडणुकीचे संपूर्ण समीकरण बदलण्याची शक्यता व्यक्त केली जात आहे. आगामी काही दिवसांत या घडामोडींना कोणता कल मिळतो, याकडे सर्वांचे लक्ष लागले आहे.
