अलिबाग(प्रतिनिधी): अलिबाग नगरपालिका निवडणुकीसाठी उमेदवारी अर्ज मागे घेण्याचा आज शेवटचा दिवस होता. नगराध्यक्षा पदासाठी आलेल्या सहा अर्जांपैकी एक अर्ज बाद झाला, तर शेकापच्या ॲड. मानसी म्हात्रे, राष्ट्रवादी काँग्रेस (शरद पवार गट) यांच्या भारती रनवरे आणि अपक्ष ॲड. कविता ठाकूर यांनी आपले अर्ज मागे घेतले. त्यामुळे नगराध्यक्ष पदासाठी शेकाप–काँग्रेस आघाडीच्या अक्षया नाईक आणि भाजप–शिवसेना युतीच्या तनुजा पेरेकर यांच्यात थेट लढत होणार आहे.
नगरसेवक पदांसाठी एकूण 22 उमेदवारांनी माघार घेतली. प्रभाग क्रमांक 2 ‘ब’ मधून शेकापचे प्रशांत नाईक बिनविरोध निवडून आले असून येथे मतदानाची आवश्यकता नाही. उर्वरीत 19 जागांपैकी 17 ठिकाणी सरळ लढत पाहायला मिळणार आहे.
प्रभाग क्रमांक 4 मधील दोन्ही जागांवर शेकाप–काँग्रेस आघाडी विरुद्ध भाजप–शिवसेना युती असा मुकाबला असताना, शिवसेना (ठाकरे गट) चे दोन उमेदवार मैदानात उतरल्याने या प्रभागातील निवडणुकीची रंगत अधिक वाढली आहे.
एकूण पाहता, अलिबाग नगरपालिकेत दोन्ही आघाड्यांमध्ये थेट आणि चुरशीचा मुकाबला रंगणार असून प्रचाराला आता वेग येण्याची शक्यता आहे.
