कोलंबो : दृष्टीहीन महिलांच्या क्रिकेटच्या इतिहासात अभूतपूर्व नवा अध्याय रचत भारतीय महिला क्रिकेट संघाने पहिल्या ‘फर्स्ट वुमेन्स टी-20 वर्ल्ड कप क्रिकेट फॉर ब्लाइंड 2025’ स्पर्धेचे विजेतेपद पटकावले आहे. कोलंबो येथे झालेल्या रोमांचक अंतिम सामन्यात भारताने नेपाळचा सात विकेट्सने पराभव करत विजयी मोहर उमटवली. प्रथम फलंदाजीची संधी मिळालेल्या नेपाळ संघाने सुरुवातीला सावध खेळ करत धावांचा पाया रचला. सरिता घिमिरेने नाबाद ३५ आणि बिमला रायने २६ धावा करीत संघाला लढतीचा स्कोअर मिळवून दिला. भारतीय गोलंदाजांनी मधल्या षटकांत अचूक मारा व कडक क्षेत्ररक्षण करत नेपाळच्या धावांची गती रोखली. अखेरीस नेपाळचा डाव निर्धारित २० षटकांत पाच गडी गमावत ११४ धावांवर थांबला. लक्ष्याचा पाठलाग करताना भारतीय संघाने सुरुवातीपासूनच आक्रमक भूमिका घेतली. सलामीवीर करुणा केने केवळ २७ चेंडूत ४२ धावा ठोकत भारताच्या विजयाचा भक्कम पाया रचला. तिच्या साथीला फुला सरीनने संयमी खेळ करत ४ चौकारांसह नाबाद ४४ धावांची चमकदार खेळी केली. दोघींच्या महत्त्वपूर्ण भागीदारीमुळे भारताने अवघ्या १२.१ षटकांत ११५ धावा करत सामना जिंकला आणि स्पर्धेत ऐतिहासिक विजेतेपद मिळवले. संपूर्ण स्पर्धेत भारताने सातत्यपूर्ण व दमदार कामगिरी करत विजयाचा मार्ग सुकर केला. गटसाखळीत अव्वल स्थान मिळवत भारताने इंग्लंड आणि श्रीलंकेवर मात करत अंतिम फेरी गाठली. फलंदाजीतील आक्रमकता, शिस्तबद्ध गोलंदाजी आणि चपळ क्षेत्ररक्षणाच्या जोरावर संघाने संपूर्ण स्पर्धेत एकतर्फी वर्चस्व राखले. हा पहिलाच महिला टी-20 विश्वचषक असल्याने भारताचा विजय केवळ ट्रॉफीपुरता मर्यादित न राहता दृष्टीहीन महिलांच्या क्रीडा व सामाजिक सबलीकरणासाठी महत्त्वपूर्ण पाऊल ठरला आहे. अनेक प्रतिकूल परिस्थितींवर मात करून या खेळाडूंनी केलेल्या लढाईला देशभरातून कौतुकाचा वर्षाव होत आहे. भविष्यात अशा स्पर्धांचे आयोजन वाढावे आणि या क्रीडा प्रकाराला अधिकाधिक व्यावसायिक संधी मिळाव्यात, अशी अपेक्षा क्रीडाविश्वातून व्यक्त केली जात आहे. भारतीय संघातील खेळाडूंनी सामन्यानंतर आनंद व्यक्त करत हा विजय संपूर्ण देशातील दृष्टीहीन मुलींना खेळात उतरण्याची प्रेरणा देणारा असल्याचे सांगितले.
