अलिबाग (प्रतिनिधी): आपल्याला असणाऱ्या चांगल्या – वाईट सवयींनुसार आपला स्वभाव चांगला किंवा वाईट बनत जातो. म्हणून वाईट स्वभाव बदलण्यासाठी छोट्या छोट्या सवयी निग्रहाने बदलणे हाच उपाय आहे असे प्रतिपादन विख्यात मनोविकास तज्ज्ञ डॉ आनंद नाडकर्णी यांनी केले आहे. विद्यासन एज्युकेशनल फाउंडेशनतर्फे अलिबाग येथे आयोजित “स्वभावाला औषध आहे!”या विषयावरील मुलाखतीत ते बोलत होते.
डॉ. नाडकर्णी यांनी सुबोध आणि मनाला भिडणाऱ्या भाषेत स्वभाव कसा बनतो, घडतो आणि बदलता येतो याबाबत सखोल मार्गदर्शन केले. राग, चीड, असुरक्षितता, भीती अशा नकारात्मक भावनांमध्ये बदल करण्यासाठी दैनंदिन जीवनातील छोट्या-छोट्या सवयी सुधारणे ही सर्वात प्रभावी सुरुवात असल्याचे त्यांनी प्रत्यक्ष उदाहरणांमधून स्पष्ट केले. व्यक्तिविकासाठी मी पासून आम्ही आणि आम्ही पासून आपण पर्यंत व्यापकता वाढविणे गरजेचे असल्याचे आग्रही प्रतिपादन त्यांनी केले. त्यांच्या संवादातील साधेपणा आणि अभ्यासपूर्ण विवेचनाचा प्रभाव श्रोत्यांवर कार्यक्रमभर होता.
अलिबाग येथील चिंतामणराव केळकर हायस्कूलमध्ये आयोजित या कार्यक्रमास परिसरातील पालक, शिक्षक, व्यावसायिक, युवक आणि वरिष्ठ नागरिक बहुसंख्येने उपस्थित होते. कार्यक्रमाची सुरुवात बालरोगतज्ज्ञ डॉ. राजीव धामणकर यांच्या नेटक्या प्रस्तावनेने झाली. कार्यक्रमापूर्वी विद्यासनच्या मार्गदर्शक स्व. विद्या पाटील आदरांजली अर्पण करण्यात आली. मुलाखती दरम्यान डॉ नाडकर्णी यांच्यासोबत विद्यासनच्या वतीने संतोष वझे आणि जाह्नवी आगाशे यांनी संवाद साधला. विद्यासनच्या स्वयंसेवकांनी कार्यक्रम निर्विघ्न आणि वेळेत पार पाडण्यासाठी महत्त्वाची भूमिका बजावली.
