रायगड (दिनकर भुजबळ):रायगड जिल्ह्यात पालकमंत्रिपदाचाही वाद न सुटणाऱ्या प्रशासनाकडून रस्त्यांसारख्या मूलभूत प्रश्नांची उकल कशी अपेक्षित करायची, असा तिखट सवाल सनय छत्रपती शासन पक्षाध्यक्ष नामदेवराव जाधव यांनी संविधान दिनी माणगाव येथे झालेल्या पत्रकार परिषदेत उपस्थित केला.
मुंबई–गोवा महामार्गाचे काम तब्बल १८–२० वर्षे प्रलंबित राहिल्याने सतत अपघातांचे सत्र सुरूच असून महामार्गावरील खड्ड्यांची परिस्थिती भयावह झाल्याचे ते म्हणाले. जिल्हाधिकारी आणि तहसीलदारदेखील रोज या खड्ड्यांतून जातात, तरीही कामांचा वेग वाढत नाही, यावर त्यांनी नाराजी व्यक्त केली.
रायगडच्या राजकारणात परिवर्तनाशिवाय विकासाचा मार्ग सुटणार नाही, अशी भूमिका जाधव यांनी मांडली. लोकांनी धर्म–जात बाजूला ठेवत विकासाला प्राधान्य देऊन मतदान केल्यास जिल्ह्याचे भविष्य बदलू शकते, असे ते म्हणाले.
स्मार्ट इलेक्ट्रिक मीटरबाबतही त्यांनी आक्षेप नोंदवला. मीटर बसविणे बंधनकारक नसतानाही नागरिकांवर सक्ती होत असल्याचा आरोप त्यांनी केला. अदानी कंपनीला दिलेल्या कामामुळे सत्ताधाऱ्यांच्या भागीदारीचा प्रश्न उपस्थित होत असल्याचेही ते म्हणाले.
जनतेत पक्षाला चांगला प्रतिसाद मिळत असून सुशिक्षित तरुणांना उमेदवारी देऊन आगामी निवडणुकांत भक्कम यश मिळेल, असा विश्वासही नामदेवराव जाधव यांनी व्यक्त केला.
