अलिबाग (प्रतिनिधी): अलिबाग शहरातील राधाकृष्ण सोसायटी येथे गुरुवारी सायंकाळी अचानक मीटर रूमला आग लागल्याने परिसरात काही काळ भीतीचे वातावरण निर्माण झाले. सोसायटीतील रहिवाशांनी धूर निघताना पाहताच तत्काळ अलिबाग नगरपरिषद अग्नीशमन विभागाला सूचना दिली. माहिती मिळताच अग्नीशमन दलाची गाडी काही मिनिटांत घटनास्थळी दाखल झाली. दलाच्या जवानांनी परिस्थितीचा वेगाने आढावा घेऊन आग नियंत्रणात आणण्यासाठी तत्परतेने प्रयत्न सुरू केले. मीटर रूममध्ये विद्युत बिघाडामुळे आग लागल्याचा प्राथमिक अंदाज व्यक्त केला जात आहे.
अग्नीशमन दलाच्या वेळेवर आणि तातडीच्या हस्तक्षेपामुळे आग इतर मजल्यांपर्यंत किंवा शेजारच्या घरांपर्यंत पसरण्यापासून रोखण्यात यश आले. सुदैवाने या घटनेत कोणतीही जीवितहानी झाली नाही. मात्र, मीटर रूममधील काही विद्युत साहित्याचे नुकसान झाल्याचे समजते. घटनास्थळी पोलिसांनीही भेट देऊन पाहणी केली असून पुढील तपास सुरू आहे.
रहिवाशांनी अग्नीशमन दलाच्या त्वरित प्रतिसादाबद्दल समाधान व्यक्त केले.
