अलिबाग(प्रतिनिधी): शहराच्या प्रवेशद्वारांवर निवडणूक कालावधीत सुरक्षा व तपासणी अधिक कडक करण्यात आली आहे. यासाठी तीन स्थिर सर्वेक्षण पथकांची तैनाती करण्यात आली असून येणाऱ्या प्रत्येक वाहन व व्यक्तींची पडताळणी करण्याचे आदेश देण्यात आले आहेत. विशेषतः उत्तरप्रदेश राज्यातून आघोरी बाबा किंवा तत्सम स्वरूपातील साधू, भिकारी किंवा फिरस्ती गट शहरात दाखल झाल्यास त्यांची ओळख, प्रवासाचा उद्देश व कागदपत्रांची काटेकोर तपासणी करण्याचे निर्देश पथकांना देण्यात येणार आहेत. कोणतीही संशयास्पद व्यक्ती अथवा हालचाल आढळल्यास त्वरित प्रशासनाला कळविण्याचेही सूचित करण्यात आले आहे.
मुख्याधिकारी सागर साळुंखे यांनी सांगितले की, निवडणुकांच्या पार्श्वभूमीवर शहरात अनावश्यक गर्दी, संशयास्पद हालचाली किंवा बाहेरील व्यक्तींकडून होणारा संभाव्य गैरप्रकार टाळण्यासाठी हे उपाय महत्त्वाचे आहेत. नागरिकांच्या सुरक्षिततेसाठी व निवडणूक प्रक्रिया सुरळीत पार पाडण्यासाठी प्रशासन सर्वतोपरी दक्ष आहे. साळुंखे यांनी नागरिकांनाही सतर्क राहून प्रशासनाला सहकार्य करण्याचे आवाहन केले.
