अलिबाग(प्रतिनिधी): कोकण एज्युकेशन सोसायटी, अलिबाग यांच्या अंतर्गत येणारी को.ए.सो. कै. धनुर्धर शंकर खोपकर माध्यमिक शाळा, परहूर-परहूरपाडा येथे शैक्षणिक वर्ष २०२५-२६ या वर्षासाठीचा वार्षिक पारितोषिक वितरण समारंभ उत्साहात पार पडला. कार्यक्रमास विद्यालयातील विद्यार्थी, पालक, शिक्षकवृंद तसेच ग्रामस्थ मोठ्या संख्येने उपस्थित होते.
समारंभाचे प्रमुख अतिथी म्हणून माजी आमदार पंडित पाटील उपस्थित होते. त्यांच्या हस्ते विविध शैक्षणिक, क्रीडा, सांस्कृतिक तसेच सहशालेय उपक्रमांमध्ये उत्कृष्ठ कामगिरी करणाऱ्या विद्यार्थ्यांना बक्षिसे वितरित करण्यात आली. विद्यार्थ्यांना गौरवित करताना पंडित पाटील यांनी गुणवंत विद्यार्थ्यांचे कौतुक केले आणि ग्रामीण भागातील मुलांनी शिक्षण व क्रीडा क्षेत्रात अधिक प्रगती करावी, अशी अपेक्षा व्यक्त केली. त्यांनी शिक्षकांच्या मेहनतीचेही कौतुक करत विद्यार्थ्यांनी उपलब्ध सर्व सुविधा आणि संधींचा योग्य उपयोग करून उज्ज्वल भविष्य घडवावे, असे सांगितले.
कार्यक्रमाच्या प्रारंभी कार्याध्यक्ष. डॉ.विशाका अमित वैद्य वार्षिक अहवाल सादर केला. विविध कलाकृती, स्पर्धा, विज्ञान प्रदर्शनात,रांगोळी, चित्रकला, सदरीकरणांनी कार्यक्रमाला रंगत आणली. शेवटी उपस्थित मान्यवरांनी शाळेच्या सर्वांगीण प्रगतीसाठी शुभेच्छा दिल्या. कार्यक्रमाची सांगता राष्ट्रगीताने झाली.
