अलिबाग (प्रतिनिधी): भारतीय क्रिकेट संघाचा कर्णधार आणि ‘हिटमॅन’ म्हणून ओळखला जाणारा रोहित शर्मा याने जिल्हा परिषद निवडणुकीत विजयी ठरलेल्या अमित नाईक यांची विशेष भेट घेत त्यांचे अभिनंदन केले. निवडणूक निकालानंतर प्रथमच झालेल्या या भेटीला विशेष महत्त्व प्राप्त झाले आहे.
अमित नाईक यांच्या विजयानंतर विविध क्षेत्रांतून त्यांच्यावर शुभेच्छांचा वर्षाव होत असताना, रोहित शर्मा यांच्यासारख्या आंतरराष्ट्रीय दर्जाच्या खेळाडूने वेळ काढून भेट देणे ही बाब उल्लेखनीय मानली जात आहे. या भेटीत रोहित शर्मा यांनी नाईक यांना पुढील राजकीय आणि सामाजिक वाटचालीसाठी शुभेच्छा दिल्या तसेच जनतेच्या अपेक्षा पूर्ण करण्यासाठी प्रामाणिकपणे काम करण्याचा सल्ला दिला.
अमित नाईक यांनीही रोहित शर्मा यांच्या भेटीबद्दल आनंद व्यक्त करत, त्यांच्या प्रेरणादायी कारकिर्दीचे कौतुक केले. क्रीडा आणि सामाजिक क्षेत्रातील अशा भेटींमुळे सकारात्मक संदेश समाजात जातो, असे मत त्यांनी व्यक्त केले.
या प्रसंगी दोघांमध्ये काही वेळ स्नेहसंवादही झाला. स्थानिक कार्यकर्त्यांमध्ये या भेटीबद्दल उत्साहाचे वातावरण निर्माण झाले असून, या अनपेक्षित भेटीची चर्चा परिसरात रंगू लागली आहे.
