भारतीय जनता पार्टी महिला व युवा मोर्चाच्यावतीने गुणगौरव कार्यक्रम
दहावी, बारावी, शिष्यवृत्ती परीक्षा उत्तीर्ण विद्यार्थ्यांचा गुणगौरव सोहळा
महिला मोर्चा जिल्हा अध्यक्षा चित्राताई पाटील यांचा पुढाकार
विद्यार्थ्यांनी भविष्यातील रोजगाराच्या संधीचा अचूक वेध घेऊन शिक्षण घ्यावे
अलिबाग (प्रतिनिधी): “सत्कार व सन्मानातून प्रेरणा मिळते आणि प्रेरणेतून राष्ट्र घडते” या उदात्त हेतूने भारतीय जनता पक्ष व भारतीय जनता युवा मोर्चा यांच्या वतीने पेझारी येथे अलिबाग तालुक्यातील इयत्ता 10वी, 12वी आणि शिष्यवृत्ती परिक्षेत यशस्वी झालेल्या गुणवंत विद्यार्थ्यांचा गुणगौरव सोहळा उत्साही वातावरणात पार पडला. या कार्यक्रमास विद्यार्थी व पालकांचा उत्स्फूर्त सहभाग लाभला.
कार्यक्रमाचे प्रमुख मार्गदर्शक म्हणून उपस्थित असलेल्या भाजप महिला मोर्चाच्या दक्षिण रायगड जिल्हाध्यक्षा सौ. चित्राताई पाटील यांनी आपल्या भाषणात विद्यार्थ्यांना प्रोत्साहन देणारा आणि दिशा दाखवणारा मौलिक सल्ला दिला. त्यांनी सांगितले की, “विद्यार्थ्यांनी भविष्यातील रोजगाराच्या संधीचा अचूक वेध घेत शिक्षण घेतले पाहिजे. रायगड जिल्हा तिसऱ्या मुंबईच्या दिशेने झेपावत असून, नवी मुंबई आंतरराष्ट्रीय विमानतळाच्या उभारणीनंतर रोजगार आणि नोकरीच्या मोठ्या संधी येथे उपलब्ध होणार आहेत. अशा काळात विद्यार्थ्यांनी फक्त मार्कांच्या मागे न लागता ज्ञान मिळवण्यावर भर द्यावा.”
तसेच, रायगड जिल्ह्यात अनेक नवे उद्योग आणि मोठे प्रकल्प उभारले जात असून, त्यासाठी कुशल व अभ्यासू मनुष्यबळाची गरज भासणार आहे. त्यामुळे विद्यार्थ्यांनी एकाग्रतेने शिक्षण घेऊन स्वतःचे भविष्य उज्ज्वल करावे, असेही त्यांनी सांगितले.
भाजप दक्षिण रायगडचे उपाध्यक्ष सवाई पाटील होते. त्यांनी आपल्या भाषणात सांगितले की, “विद्यार्थ्यांच्या यशाचा गौरव करणे म्हणजे त्यांच्या आत्मविश्वासाला बळ देणे. समाजात सकारात्मक बदल घडवण्यासाठी शिक्षणाचं महत्त्व मोठं आहे.” त्यांनी या गुणवंत विद्यार्थ्यांचे कौतुक करत त्यांना पुढील वाटचालीस शुभेच्छा दिल्या.
या सोहळ्यात ऍड. आस्वाद पाटील, भाजप दक्षिण रायगडचे उपाध्यक्ष सवाई पाटील, महिला मोर्चा माजी अध्यक्षा मंजुषा कुदृमोती, माजी सरपंच सुमन पाटील, तसेच भाजपचे अनेक पदाधिकारी व कार्यकर्ते उपस्थित होते. गुणवंत विद्यार्थ्यांना सन्मानचिन्ह, प्रमाणपत्र आणि पुष्पगुच्छ देऊन सन्मानित करण्यात आले.
कार्यक्रमाचे आयोजन काटेकोरपणे व उत्साहात पार पडले. उपस्थित पालकांनी व ग्रामस्थांनी अशा उपक्रमांचे कौतुक करत भविष्यातही अशाच प्रेरणादायी कार्यक्रमांची अपेक्षा व्यक्त केली. संपूर्ण परिसरात विद्यार्थ्यांच्या यशाचा आनंद साजरा करण्यात आला.
हा गुणगौरव सोहळा केवळ एक कार्यक्रम न राहता विद्यार्थ्यांमध्ये नवीन उमेद आणि स्वप्न निर्माण करणारा क्षण ठरला. शिक्षण, मेहनत आणि प्रेरणा यांच्या त्रिसूत्रीने राष्ट्र उभारण्याचा संकल्प इथं दृढ झाल्याचे या कार्यक्रमातून स्पष्टपणे जाणवले.
